Россия пойтахти Москва шаҳрида 5 октябрдан бошлаб иш берувчиларга ходимларни масофавий ишга ўтказиш мажбурий этиб белгиланади. Бу ҳақда шаҳар мэри Сергей Собянин маълум қилди, деб ёзмоқда «Интерфакс».
Шаҳар мэрининг қарорига кўра, 5 октябрдан 28 октябргача ходимлар умумий сонининг камида 30 фоизи, шунингдек, 65 ёшдан катта ва сурункали касаллиги бўлган барча ходимлар масофавий ишлашга ўтказилиши керак. Ташкилот фаолияти учун иш жойида бўлиши жуда муҳим ҳисобланадиган ходимлар иш жойига бориб ишлаши мумкин бўлади.
Бундан ташқари, мазкур талаб тиббий ташкилотлар, ҳарбий саноат комплекси корхоналари, «Росатом», «Роскосмос» ва бошқа баъзи стратегик соҳаларга тааллуқли бўлмайди.
Москва мэрининг таъкидлашича, иш жойида бўлиши мажбурий бўлмаган барча ходимларнинг масофавий ишлашга ўтказилиши ҳақидаги чақирувдан кейин жамоат транспортидаги қатновлар сони етарли даражада камаймаган.
«Оғир шаклдаги COVID-19’ни ташиётганлар сони ҳам кўпаймоқда — 1,5 мингдан ортиқ одам», — дея таъкидлаган Собянин. Унинг маълум қилишича, касалланганлар орасида болалар улуши биринчи марта 19 фоиздан ошган. Ёши 65 дан катта бўлган беморлар улуши эса 20-25 фоизни ташкил қилмоқда, ёз ойларида эса бу кўрсаткич 15 фоизни ташкил этган.
Собяниннинг умид билдиришича, кўрилган чоралар коронавирус билан касалланиш ҳолатлари ўсишининг олдини олиш учун етарли бўлади.
Москвада ўтган бир сутка ичида коронавирус билан касалланиш бўйича 2424 та янги ҳолати қайд этилган — бу тўрт ойдан буён кузатилган энг юқори кўрсаткич ҳисобланади. Янги касалланганларнинг 13,6 фоизини болалар ташкил қилган. Баҳор ва ёз ойларида коронавирус билан касалланган болаларнинг улуши одатда 10 фоиздан ошмаган.
Аввалроқ Москвада COVID-19 беморлари сони ортгани туфайли мактаблардаги таътил вақти узайтирилгани ҳақида хабар берилганди. Москва мэри Сергей Собянин 65 ёшдан катталар, шунингдек, сурункали касаллиги бор инсонлардан 28 сентябрдан бошлаб уйда қолишни сўраган.
Изоҳ (0)