Rossiya poytaxti Moskva shahrida 5-oktabrdan boshlab ish beruvchilarga xodimlarni masofaviy ishga o‘tkazish majburiy etib belgilanadi. Bu haqda shahar meri Sergey Sobyanin ma’lum qildi, deb yozmoqda “Interfaks”.
Shahar merining qaroriga ko‘ra, 5-oktabrdan 28-oktabrgacha xodimlar umumiy sonining kamida 30 foizi, shuningdek, 65 yoshdan katta va surunkali kasalligi bo‘lgan barcha xodimlar masofaviy ishlashga o‘tkazilishi kerak. Tashkilot faoliyati uchun ish joyida bo‘lishi juda muhim hisoblanadigan xodimlar ish joyiga borib ishlashi mumkin bo‘ladi.
Bundan tashqari, mazkur talab tibbiy tashkilotlar, harbiy sanoat kompleksi korxonalari, “Rosatom”, “Roskosmos” va boshqa ba’zi strategik sohalarga taalluqli bo‘lmaydi.
Moskva merining ta’kidlashicha, ish joyida bo‘lishi majburiy bo‘lmagan barcha xodimlarning masofaviy ishlashga o‘tkazilishi haqidagi chaqiruvdan keyin jamoat transportidagi qatnovlar soni yetarli darajada kamaymagan.
“Og‘ir shakldagi COVID-19’ni tashiyotganlar soni ham ko‘paymoqda — 1,5 mingdan ortiq odam”, — deya ta’kidlagan Sobyanin. Uning ma’lum qilishicha, kasallanganlar orasida bolalar ulushi birinchi marta 19 foizdan oshgan. Yoshi 65 dan katta bo‘lgan bemorlar ulushi esa 20-25 foizni tashkil qilmoqda, yoz oylarida esa bu ko‘rsatkich 15 foizni tashkil etgan.
Sobyaninning umid bildirishicha, ko‘rilgan choralar koronavirus bilan kasallanish holatlari o‘sishining oldini olish uchun yetarli bo‘ladi.
Moskvada o‘tgan bir sutka ichida koronavirus bilan kasallanish bo‘yicha 2424 ta yangi holati qayd etilgan — bu to‘rt oydan buyon kuzatilgan eng yuqori ko‘rsatkich hisoblanadi. Yangi kasallanganlarning 13,6 foizini bolalar tashkil qilgan. Bahor va yoz oylarida koronavirus bilan kasallangan bolalarning ulushi odatda 10 foizdan oshmagan.
Avvalroq Moskvada COVID-19 bemorlari soni ortgani tufayli maktablardagi ta’til vaqti uzaytirilgani haqida xabar berilgandi. Moskva meri Sergey Sobyanin 65 yoshdan kattalar, shuningdek, surunkali kasalligi bor insonlardan 28-sentabrdan boshlab uyda qolishni so‘ragan.
Izoh (0)