АҚШнинг Президентлик дебатлари бўйича комиссияси (CPD) номзодларнинг кейинги дебатлари қоидасига ўзгатириш киритмоқчи. Бу ҳақда CBS телеканалига таяниб «РБК» хабар берди.
Хусусан, дебат модераторларига иштирокчиларнинг микрофонларини ўчириб қўйишга рухсат берилади.
Бундай қарор амалдаги президент Дональд Трамп ва демократлардан номзод Жо Байден 30 сентябрга ўтар кечаси бўлиб ўтган биринчи бедатда бир-бирларининг гапини бир неча марта бўлиб, шахсиятга ўтиб кетганидан кейин қабул қилинган.
CNN’нинг ёзишича, Байден комиссия қарорини маъқуллади ва улар номзодларнинг сўзини бўлмасдан гапириш ҳуқуқини таъминлай олишига умид билдирди.
Трамп сайлов кампаниясининг матбуот котиби Тим Мертау, аксинча, дебат тартибига ўзгартириш киритилганини қоралади. «CPD ўйин ўртасида қоидаларни ўзгартирмаслиги керак. Улар буни кеча кечаси Жо Байден ютқазгани учунгина қилишяпти. Президент Трампнинг қўли баланд келди. Энди Байден модераторлар ишига аралашишга ҳаракат қиляпти», — деган Мертау.
Эслатиб ўтамиз, АҚШда президентликка номзодларнинг биринчи дебати 30 сентябрга ўтар кечаси бўлиб ўтди. Баҳслар давомида рақиблар доимий равишда шахсиятга ўтиб кетган. Трамп тез-тез Байденнинг гапини бўлиб қўйган, бунинг учун бир неча марта бошловчи Крис Уоллесдан танбеҳ эшитган, Байденнинг ўзи эса Трамп унинг гапини бўлган вақтда тўғридан-тўғри «Жим бўл, бола. Бу президентга ярашмайди», деган. Дебат чоғида демократлар номзоди амалдаги президентни «Путиннинг лайчаси», ёлғончи, клоун ва АҚШ тарихидаги энг ёмон президент, деб атаган.
Кўплаб таҳлилчиларнинг фикрича, дебатда иккала номзоднинг ҳам чиқиши кучсиз бўлди. Баъзи таҳлилчилар эса бу дебатни «тарихдаги энг ёмони» деб атаган.
Сайловга қадар яна иккита дебат бўлиб ўтади. Трамп ва Байденнинг иккинчи учрашуви 15 октябрда Майамида, учинчиси эса 22 октябрда Нэшвиллда ўтказилади. Бундан ташқари, вице-президентликка номзодлар ҳам битта дебат ўтказади.
АҚШ президентлигига сайлов эса 3 ноябрь куни бўлиб ўтади.
Изоҳ (0)