Қашқадарёда ҳайдовчига таҳдид қилиб, унга тан жароҳати етказган ва автомобилини тортиб олган эр-хотинга суд ҳукми ўқилди

Қашқадарё вилоятининг Муборак туманида ҳайдовчини арматура билан уриб, пичоқ билан қўрқитган ва унга тегишли автомобилни тортиб олган эр-хотинга суд ҳукми ўқилди. Бу ҳақда «Дарё»га Жиноят ишлари бўйича Муборак туман суди раиси Алишер Қаҳҳоров маълум қилди.

Аниқланишича, 2019 йил март ойида 20 ёшли Асқар (барча исмлар ўзгартирилган) ота-онасининг хоҳишига қарши Миришкор туманининг Жейнов қишлоғида яшовчи 24 ёшли Адолатни олиб қочган ва унга уйланган. Дастлаб эр-хотин Адолатнинг уйида яшаб келган. Ишсизлик сабаб оилада муаммолар юзага келавергач 2019 йил 1 октябрь куни улар Муборак туманидаги озиқ-овқат деҳқон бозорига бориб, иш излашга тушган.

Иш топилмагач мўмай даромад топиш мақсадида таксичиларни тунашни мақсад қилган эр-хотин бозор ҳудудидан арматура бўлаги, ошхона пичоғини олиб, кийимига яширган.

Сўнгра бозорча ҳудудида кира қилиб юрган «ВАЗ-2105» русумли «Жигули» ҳайдовчиси Бобурга Муборак туманининг Ўтрор қишлоғига олиб бориб қўйишини, эвазига 90 минг сўм йўл ҳақи беришини айтиб, йўлга чиққан.

Машина чўл ҳудудидан ўтаётганда олдиндан тузилган режага кўра, Адолат тоби қочаётганини баҳона қилиб, ҳайдовчига машинани тўхташини айтган. Адолат машинадан тушгач Асқар ҳам унинг ортидан тушган. Улар чўлдаги жинғил панасига ўтган. Шунда Адолат қорни оғриётганини айтиб, бақира бошлаган. Асқар эса ҳайдовчи Бобурни ёрдамга чақирган.

Ҳайдовчи ва Асқар Адолатни кўтариб, машинага чиқармоқчи бўлишганида Асқар Адолатни кўтариб кетаётган ҳайдовчининг бошига арматура билан уради ва ерга йиқитади. Қочишга уринган Бобурга пичоқ ўқталиб, ёнидаги пули ва машинасини беришини талаб қилган. Айтганини бажармаса, пичоқ билан ўлдиришини айтган.

Ҳайдовчи пичоқ ўқталган эр-хотинга ёнидаги пуллари ва машинаси калитини беришини, фақат уни ўлдирмасликларини сўрайди. Эр-хотин машина калити ва ҳайдовчининг пулларини олиб, ҳайдовчини чўлда қолдирган. Талончи эр-хотиндан қутилган Бобур бир неча соат йўл юриб, қишлоққа кирган ва акасига қўнғироқ қилиб, ёрдам сўраган.

Машина ва ҳайдовчининг пулларини қўлга киритган эр-хотин эса Бухоро вилояти томон йўл олган. Бироқ, йўлда машина лойга ботиб қолгани боис эр-хотин ўша куни кечаси машинада қолишга мажбур бўлган. Эрталаб уйғонганда эса, ИИБ ходимлари томонидан қўлга олинган.

20 ёшли эр ва 24 ёшли хотин қилмишини кўриб чиққан Жиноят ишлари бўйича Муборак туман суди эрнинг қилмиши учун унга 12 йил, хотинига эса 7 йил озодликдан маҳрум қилиш жазосини тайинлаган.