Andijon viloyatida tanishi bilan spirtli ichimlik iste’mol qilib, tanishining mast holda qilgan taklifidan ranjigan va sherigini pichoqlagan ayolga sud hukmi o‘qildi. Bu haqda “Daryo”ga Jinoyat ishlari bo‘yicha Andijon viloyat sudi sudya katta yordamchisi Komronshoh Rasulov xabar berdi.

Aniqlanishicha, muqaddam uch marotaba sudlangan 41 yoshli G.A. 2018-yil ozodlikka chiqqanidan so‘ng Andijon shahar, Lermontov ko‘chasida yashovchi tanishining uyida yashab kelgan.

2019-yil 18-noyabr kuni uning xonadoniga tanishi L.K. uni ko‘rish maqsadida kelib, o‘zi bilan birga olib kelgan spirtli ichimlikni G.A. va xonadon egasi bilan birga iste’mol qilgan. Uchovlon ichkilikni ichib, o‘zaro suhbatlashib o‘tirganida L. tanishi G.ga jinsiy aloqa qilishni taklif qilgan. Va u rad qilishiga qaramasdan, taklifni takrorlashda davom etgan. Bunday munosabatdan jahli chiqqan G.A. oshxonada turgan xo‘jalik pichog‘ini olib, L.ni qo‘rqitish maqsadida uning qorin sohasiga bir marotaba sanchib olgan va jarohatlagan.

Sudda jabrlanuvchi L.K. so‘zga chiqib, shahar hududida isiriq tutatib, tirikchilik qilib kelishini, haqiqatan ham o‘sha kuni shunday voqea bo‘lganligini, tanishiga nisbatan hech qanday da’vosi yo‘qligini bildirgan.

Sud G.A.ni Jinoyat kodeksining 104-moddasi 3-qismining “b” bandi (qasddan badanga o‘rtacha og‘ir shikast yetkazish) bilan aybli deb topib, uni 5 yilga ozodlikdan mahrum qilish bilan jazolagan. Shuningdek, G.A. o‘ta xavfli retsidivіst deb topilib, jazoni qattiq tartibli koloniyada o‘tashi belgilangan.