Эндиликда ҳайдовчилар ёнида транспорт воситалари эгаларининг фуқаролик жавобгарлигини мажбурий суғурта қилиш бўйича суғурта полиси бўлмаса, транспорт воситалари жарима майдончасига олиб кетилмайди, деб хабар бермоқда «Gazeta.uz».
Ўзбекистон Президенти 28 сентябрда имзолаган қонун билан Маъмурий жавобгарлик тўғрисидаги кодекснинг 291-моддаси (транспорт воситаларини ушлаб туриш ва кўрикдан ўтказиш асослари ва тартиби)га тегишли ўзгаришлар киритилган бўлиб, янги тартиб у расман эълон қилинган кундан, 29 сентябрдан кучга киради.
Шунга қарамай, ёнида суғурта полиси бўлмаган ҳайдовчи жаримага тортилади. Ҳозирда унинг қиймати базавий ҳисоблаш миқдорининг бир бараварига тенг (223 000 сўм).
Эслатиб ўтамиз, август ойи бошларида «Менинг фикрим» порталига суғурта полиси йўқлиги туфайли автотранспорт воситасини жарима майдонига қўйиш амалиётини бекор қилиш ҳақидаги петиция жойлаштирилган ва у парламентда кўриб чиқиш учун етарли бўлган 10 000 дан ортиқ овоз тўплаганди.
Сенаторлар ушбу амалиётнинг бекор қилиниши бундай қоидабузарлик ҳолатига нисбатан жазо базасини қисқартириш ҳамда фуқароларнинг мулкка бўлган ҳуқуқларини кучайтириш ҳамда бу орқали коррупсиоген ҳолатларининг олдини олиш имконини беришини таъкидлаган.
Изоҳ (0)