Футбол бўйича Англия Премьер Лигасининг 3-турида «Манчестер Юнайтед» 26 сентябрь, шанба куни «Брайтон» майдонига сафар қилди.
Дастлаб майдон эгалари 40-дақиқада пенальтидан урилган гол эвазига олдинга ўтиб олди. Бруну Фернандеш ўз жарима майдонида ўйин қоидасини бузди ва белгиланган 11 метрлик жарима зарбасини Нил Мопе аниқ ижро этди.
Орадан уч дақиқа ўтиб манкунианлар мувозанатни тиклашга муваффақ бўлди. Зарима зарбасидан узатилган тўпни Неманя Матич дарвозабон майдончаси томон тепди, у ерда Льюис Данк ўз дарвозасини ишғол қилиб қўйди.
Иккинчи бўлимни меҳмонлар фаол бошлади ва тезкор гол уришга эришди. 55-дақиқада Фернандешнинг узатмасидан кейин Маркус Рэшфорд чап қанотдан тезлик олиб ярим майдонни босиб ўтди ва жарима майдонида бир неча рақибни алдаб дарвозани ишғол қилди.
Барчаси «Манчестер Юнайтед»нинг ғалабаси томон кетаётган бир паллада Солли Марч ҳакам томонидан қўшиб берилган вақтнинг сўнгги дақиқасида ҳисобни тенглаштирди. Бироқ сўнгги ҳужум вақтида Мопе бурчак зарбасидан кейин юзага келган ҳолатда тўпни қўли билан ўйнади. Натижада ҳакам ўйин якунланинишини маълум қилган бўлса-да, видеотакрорлардан кейин пенальти белгилади. Уни Фернандеш голга айлантирди.
Шу тариқа «Манчестер Юнайтед» Премьер Лига янги мавсумидаги илк ғалабасини қўлга киритди.
АПЛ
3-тур баҳси
26 сентябрь, шанба
«Брайтон» — «Манчестер Юнайтед» 2:3
Голлар: 1:0 – 40, пенальти Мопе, 1:1 – 43, автогол Данк, 1:2 – 55 Рэшфорд, 2:2 – 90+5 Марч, 2:3 – 90+10, пенальти Фернандеш.«Брайтон»: Райан, Уэбстер, Данк, Уайт, Лэмпти, Лаллана (Gross, 75), Марч, Алсате, Троссард, Мопе, Коннолли (Жахонбаҳш, 75).
«Манчестер Юнайтед»: Де Хеа, Уан-Биссака, Шоу, Линдельоф, Магуайр, Погба (Фред, 65), Бруну Фернандеш, Матич, Марсьяль, Гринвуд (Байи, 83), Рэшфорд.
Огоҳлантиришлар: Бруну Фернандеш (22), Матич (41), Троссард (42), Уайт (74), Данк (83).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)