УЕФА Еврокубокларда коронавирус билан боғлиқ ҳолатлар аниқланган тақдирда ўйинлар қай тарзда ўтказилишини маълум қилди

УЕФА ижроқўми коронавирус пандемияси даврида Чемпионлар Лигаси ва Европа Лигаси учрашувлари қай тариқа ўтказилишини маълум қилди.

Клубнинг бир ёки бир нечта вакилида коронавирус аниқланган тақдирда, агар маҳаллий ҳукумат жамоани карантинга олиш қарорига келмаса учрашув ўз вақтида бўлиб ўтади. Жамоада ўйинга лаёқатли 13 футболчи (камида бир нафар дарвозабон билан) мавжуд бўлса, у ҳолда учрашув ўз вақтида ўтказилади. Агар 13 футболчи топилмайдиган бўлса, УЕФА ўйинни қолдиришга рухсат беради.

Қўшимча вариант сифатида клуб майдонга Еврокубоклар қайдномасига киритилмаган ёки айрим сабаблар туфайли ундан қолиб кетган футболчилардан фойдаланиши мумкин бўлади. Фақат бунинг учун ўйинчи миллий ассоциация рўйхатидан ўтган бўлиши керак. Агар учрашувни қолдиришнинг иложи бўлмаса, ўйинга туша олмаган жамоа бунга жавобгар бўлади ва унга 0:3 ҳисобидаги техник мағлубият ёзилади.

Шунингдек, ташкилот ижроқўми Еврокубоклар ва Миллатлар Лигаси 2020/21 йилги мавсумида беш ўйинчи алмаштириш қоидасини ўз кучида қолдирди.