Futbol bo‘yicha Angliya Premyer Ligasining 3-turida “Manchester Yunayted” 26-sentabr, shanba kuni “Brayton” maydoniga safar qildi.
Dastlab maydon egalari 40-daqiqada penaltidan urilgan gol evaziga oldinga o‘tib oldi. Brunu Fernandesh o‘z jarima maydonida o‘yin qoidasini buzdi va belgilangan 11 metrlik jarima zarbasini Nil Mope aniq ijro etdi.
Oradan uch daqiqa o‘tib mankunianlar muvozanatni tiklashga muvaffaq bo‘ldi. Zarima zarbasidan uzatilgan to‘pni Nemanya Matich darvozabon maydonchasi tomon tepdi, u yerda Lyuis Dank o‘z darvozasini ishg‘ol qilib qo‘ydi.
Ikkinchi bo‘limni mehmonlar faol boshladi va tezkor gol urishga erishdi. 55-daqiqada Fernandeshning uzatmasidan keyin Markus Reshford chap qanotdan tezlik olib yarim maydonni bosib o‘tdi va jarima maydonida bir necha raqibni aldab darvozani ishg‘ol qildi.
Barchasi “Manchester Yunayted”ning g‘alabasi tomon ketayotgan bir pallada Solli March hakam tomonidan qo‘shib berilgan vaqtning so‘nggi daqiqasida hisobni tenglashtirdi. Biroq so‘nggi hujum vaqtida Mope burchak zarbasidan keyin yuzaga kelgan holatda to‘pni qo‘li bilan o‘ynadi. Natijada hakam o‘yin yakunlaninishini ma’lum qilgan bo‘lsa-da, videotakrorlardan keyin penalti belgiladi. Uni Fernandesh golga aylantirdi.
Shu tariqa “Manchester Yunayted” Premyer Liga yangi mavsumidagi ilk g‘alabasini qo‘lga kiritdi.
APL
3-tur bahsi
26-sentabr, shanba
“Brayton” — “Manchester Yunayted” 2:3
Gollar: 1:0 – 40, penalti Mope, 1:1 – 43, avtogol Dank, 1:2 – 55 Reshford, 2:2 – 90+5 March, 2:3 – 90+10, penalti Fernandesh.“Brayton”: Rayan, Uebster, Dank, Uayt, Lempti, Lallana (Gross, 75), March, Alsate, Trossard, Mope, Konnolli (Jaxonbahsh, 75).
“Manchester Yunayted”: De Xea, Uan-Bissaka, Shou, Lindelyof, Maguayr, Pogba (Fred, 65), Brunu Fernandesh, Matich, Marsyal, Grinvud (Bayi, 83), Reshford.
Ogohlantirishlar: Brunu Fernandesh (22), Matich (41), Trossard (42), Uayt (74), Dank (83).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)