Коронавирус пандемияси сабабли Рио-де-Жанейро Самба мактабларининг мустақил лигаси 2021 йил февраль ойида бўлиб ўтиши керак бўлган анъанавий карнавал юришларини кейинга қолдиришга қарор қилди. Бу ҳақда ассоциация раҳбари Хорхе Кастанейро маълум қилди, дея хабар берди «РБК».
«Шунча ноаниқлик, илм-фан соҳасидаги ушбу беқарорлик туфайли, февралда вакцина бўлиши ёки бўлмаслигини билиш имкони йўқлиги сабаб биз тадбирни кейинга қолдириш керак деган хулосага келдик», – деди Кастанейро.
Унинг сўзларига кўра, 2021 йилда бўлиб ўтадиган карнавалнинг аниқ саналари ҳақида гапиришга ҳали эрта. Шу билан бирга, у баъзи прогнозларга кўра, апрель ойидан бошлаб карнавал учун хавфсиз шароитлар мавжуд бўлиши мумкинлигини таъкидлади.
Лекин Бразилия ҳукумати коронавирус тарқалиш хавфига қарамай 2020 йил февраль ойида бўлиб ўтадиган карнавални бекор қилишни рад этди.
Жонс Ҳопкинс университети маълумотларига кўра, Бразилия COVID-19 касаллигига чалинганлар сони бўйича дунёда учинчи ўринда туради. Эпидемия бошланганидан бери у ерда 4,6 миллиондан ортиқ одам коронавирус билан касалланган. Улардан 139 мингдан ортиғи вафот этган.
Аввалроқ Бразилия президенти мамлакат коронавирусни енгганини маълум қилганди.
Изоҳ (0)