Москва мэри Сергей Собянин 65 ёшдан катталар, шунингдек, сурункали касаллиги бор инсонлардан 28 сентябрдан бошлаб уйда қолишни сўради. Россия пойтахти мэрининг тавсияси Собяниннинг сайтида эълон қилинган.
Бу каби инсонлардан зарурат бўлмаганидан уйдан чиқмаслик сўралади. Улар имкони борича камроқ дўкон ва дорихоналарга бориши ва доимо ниқоб ҳамда қўлқопда бўлиши керак. Шунингдек, алоҳида яшайдиган қариндошлар ва яқинлари билан вақтинча мулоқотда бўлмаслик тавсия қилинган. Очиқ ҳаводаги сайр ва бадантарбия билан шуғулланиш тақиқланмайди.
65 ёшдан катта ва сурункали касаллиги бор инсонларга масофадан туриб ишлаш ёки таътилга чиқиш тавсия этилган.
Шунингдек, Собянин иш берувчиларга ҳам мурожаат қилиб, имкони борича кўпроқ ходимларни масофадан ишлатишни сўраган. У иш жойларида санитария-эпидемиология хавфсизлиги чораларига қатъий риоя қилишни тавсия этган: дезинфекция ўтказиш, масофаланишга риоя қилиш, ниқоб ва қўлқоплардан фойдаланиш, ходимлар тана ҳароратини ўлчаш ва уларни COVID-19’га текшириш.
Шунингдек, Собянин транспортда, дўконлар ва бошқа жамоат жойларига боришда ҳам ниқоб ҳамда қўлқоп режимига риоя қилинишини сўраган. «Баҳордаги қаттиқ карантин чораларига қайтишни истамаймиз. Умид қиламанки, биз бундан қоча оламиз. Фақат ўзимизни ва яқинларимизни эҳтиёт қилсаккина», — дейди Москва мэри.
Аввалроқ Москвада июнь охиридан бери биринчи бор коронавирус билан суткалик касалланиш ҳолати минг кишидан ошгани тўғрисида хабар берилганди.
Мавзуга доир: Россиялик шифокор COVID-19 беморлари аҳволини ёмонлаштирадиган касалликларни маълум қилди
Изоҳ (0)