Владимир Путин ва Эммануэль Макроннинг телефон суҳбатларига оид маълумотлар ОАВда тарқалиб кетгани юзасидан Франция Ташқи ишлар вазирлиги тергов ишларини бошлади.
«Ҳар қандай ички шахсий ҳужжатларнинг тарқалиб кетишига йўл қўйиб бўлмайди. Шу сабабли изоҳ беришга шошилмаяпмиз. Тергов олиб борилмоқда. Республика президентининг Россия билан ўрнатишни истаган диаологи барча, жумладан, хавфсизлигимизга оид масалаларни ечишга йўналтирилган бўлиб, у очиқлик ва талабчанлик руҳида ўтган ҳамда шу руҳда давом этади», — дейилади Франция ташқи сиёсий идораси хабарида.
Эслатиб ўтамиз, 22 сентябрь куни Франциянинг Le Monde газетаси Владимир Путин Эммануэль Макрон билан суҳбатда россиялик сиёсатчи Алексей Навальнийни «интернетдаги оддий фитначи» деб атаган ва у «Новичок» гуруҳига кирувчи заҳар билан ўзини ўзи заҳарлаган бўлиши мумкинлигини тахмин қилган. Кейинроқ Навальний Путиннинг тахминига жавоб қайтариб, «аҳмоққа ўхшаб 18 кун комада ётдим» дея киноя қилган.
Аввалроқ Германия ҳукумати ҳам Алексей Навальний Россияда «Новичок» турига кирувчи модда билан заҳарланганини билдирган. У икки ҳафтадан ортиқ вақт давомида комада ётган, 10 сентябрь куни Навальний заҳарланганидан сўнг тўлиқ ўзига келган ва 15 сентябрда тузала бошлаганидан кейин илк бор Instagram’да пост қолдирган, сиёсатчи 19 сентябрда тикланиш жараёни қандай кетаётгани ҳақида гапириб берган.Германия Навальнийнинг заҳарланишига оид маълумотларни Кимёвий қуролни тақиқлаш ташкилотига юборган. Россия ҳукумати дастлаб Омскдаги касалхонада сиёсатчидан олинган тестлар организмда заҳар борлигини кўрсатмаганини таъкидлаганди.
Изоҳ (0)