Буюк Британия ва Францияда 24 сентябрь куни COVID-19 билан касалланган беморларнинг кунлик ўсиши бўйича рекорд янгиланди, деб хабар бермоқда «РБК».
Daily Mail’нинг Буюк Британия Соғлиқни сақлаш вазирлиги директори Ивонн Дойлнинг баёнотига асосланиб хабар беришича, 24 сентябрь куни COVID-19’га чалиниш бўйича 6,6 мингдан ортиқ янги ҳолат қайд этилди. Бу мамлакатда эпидемия бошланганидан буён рекорд кўрсаткич.
Буюк Британияда умумий ҳисобда 416 мингдан ортиқ киши касаллангани қайд этилган. Дойлнинг сўзларига кўра, сўнгги ҳафтада коронавирусга чалиниш бўйича кунлик кўрсаткич қарийб икки баравар ошди. Ўтган ҳафтада 3395 кишида коронавирус аниқланган.
Шунингдек, сўнгги суткада COVID-19’дан 40 киши вафот этган. Дойлнинг қайд этишича, касалланиш барча ёшдагилар орасида ўсмоқда, касалхонага ётқизилганлар сони ҳам ошган. «Биз барчамиз вирус тарқалишининг олдини олишга ёрдам берадиган янги чораларга амал қилишимиз лозим», — деган Дойл.
Июнь ойи охиридан август бошларигача Буюк Британияда кунлик касалланишлар сони 1 минг нафаргача тушган, сўнг яна кўтарила бошлаган.
Мамлакат бош санитар шифокори Крис Утти 21 сентябрь куни Буюк Британияда коронавирус тарқалиши билан боғлиқ вазият оғирлашганини маълум қилганди. Унинг эртасига мамлакат ҳукумати эпидемиологик вазият ёмонлашгани сабабли чекловларни ярим йилга кескинлаштирди.
Бош вазир Борис Жонсон сўнгги бир ой ичида мамлакатда кунлик аниқланадиган COVID-19 беморлари сони тўрт баравар ошошганини, мамлакатда қайта карантин жорий этилиши мумкинлигини маълум қилган. Шифокорлар октябрь ойида бу кўрсаткич 10 минг кишига етиши мумкинлигини истисно этмаган.
Бундан ташқари, кунлик касалланишлар сони Францияда ҳам ошган. Figaro’нинг ёзишича, сўнгги суткада мамлакатда 16 096 киши вирусга чалингани қайд этилган. Эпидемия бошланганидан буён мамлакатда қарийб 500 минг киши COVID-19’га чалинган.
Август ўрталарида Францияда карантин юмшатилганидан сўнг COVID-19’га чалиниш бўйича кунлик касалланишлар сони ошган эди. Мамлакатда ниқоб тақмаганлик учун жарима белгиланган.
Изоҳ (0)