Исроилда 25 сентябрдан бошлаб карантин чекловлари кучайтирилди, деб хабар беради Исроилнинг Кан радиосига таяниб «РБК». Маҳаллий оммавий ахборот воситалари кўрилган чораларни «герметик» карантин деб атади.
Жиддий чекловлар икки ҳафта давомида амал қилади, кейин уларни бекор қилиш ёки узайтириш масаласи ҳал қилинади. Карантин даврида фақат озиқ-овқат дўконлари ва зарур молларни сотадиган дўконлар ишлашни давом эттиради.
Бундан ташқари, мамлакатда ҳаракатланишга чекловлар қўйилди. Аҳолининг уйларидан 1 километрдан ортиқ масофада узоқлашиши тақиқланади, барча ибодат ҳамда намойишлар фақат шу масофада очиқ жойларда ва 20 кишидан кўп бўлмаган кишилар билан ўтказилиши мумкин.
The Times of Israel газетасининг ёзишича, кетма-кет иккинчи куни мамлакатда аниқланаётган касалланганлар сони 7 мингга яқинлашмоқда. Пандемия бошланганидан бери Жонс Ҳопкинс университетининг маълумотларига кўра, Исроилда 212,1 минг киши коронавирус билан касалланган.
Мавзуга доир: Британия бош вазири Борис Жонсон мамлакатда қайта карантин жорий этилиши мумкинлигини маълум қилди
Аввалроқ Украина, Канада, Чехия, Австрия ва Грузияда ҳам коронавируснинг иккинчи тўлқини бошлангани хабар берилган эди. Буюк Британияда COVID-19 билан боғлиқ вазият баҳордаги кўрсаткичга қайтмоқда. Бир ойдан бери туристлар учун очиқ бўлган Туркияда коронавирус тарқалиши яна авж олди
Изоҳ (0)