Беларуслик хакерлар Александр Лукашенко режимига «умумий ҳужум» амалга оширилишини маълум қилди

Беларуслик хакерлар Александр Лукашенко режимига ҳужум уюштирилишини маълум қилди, деб хабар бермоқда «Korrespondent.net».

Хакерлар томонидан маълум қилинишича, Лукашенко режимига нисбатан «умумий ҳужум» 24—30 сентябрь кунлари амалга оширилади. Уларнинг сўзларига кўра, ҳокимиятни қонунга хилоф равишда тортиб олган шахс тез орада бунинг ҳаққини тўлайди.

Хакерларнинг қўшимча қилишича, улар ҳаракат режаси бузилмаслиги учун атайлаб огоҳлантириш эълон қилмайди.

Эслатиб ўтамиз, 23 сентябрь куни Александр Лукашенко яширинча инаугурация маросимини ўтказган ва расман Беларусь президенти лавозимида иш бошлаган. Бу эса мамлакатда норозиликларнинг янги тўлқини юзага келтирди.

Шундан сўнг Литва, Латвия, Эстония, Словакия, Украина, Германия, Канада, Польша, АҚШ, Буюк Британия ва Европа Иттифоқи Лукашенкони Беларуснинг қонуний президенти сифатида тан олишдан бош тортди.

Беларусь мухолифати етакчиси Светлана Тихановская Александр Лукашенконинг Беларусь президентлиги лавозимига яширин инаугурациясига бағишланган видеомурожаат йўллаб, унда ўзини беларус халқининг ягона етакчиси деб атади.