Ўзбекистон Президенти Шавкат Мирзиёев 18 сентябрь куни бўлиб ўтган йиғилишда мамлакатдаги коронавирус билан боғлиқ вазият ҳақида гапирди. Хусусан, давлат раҳбари мактаблар очилиши билан боғлиқ вазиятга тўхталди.
Давлат раҳбари мактабларда ўқув йилининг бошланиши муносабати билан ўқитувчилардан коронавирус тести олинаётгани ва уларнинг кўпчилигида касаллик аниқланаётганини маълум қилди.
«Биз мактабгача таълим, халқ таълими, олий таълимда ўқишни бошлаяпмиз. Мактабнинг ҳар бир ота-онаси билан гаплашиб, талабга қараб чора-тадбирлар қилиб, шароит яратяпмиз. Ўқитувчиларни тест қилганимизда, минг афсус, кўпчилигида касаллик чиқяпти. Бу адолатли ҳақиқат», — деди Президент.
Аввалроқ Қашқадарё вилояти халқ таълими бошқармаси бошлиғи Абдуғани Ҳимматов «Дарё»га вилоятда 855 нафар мактаб ходимида коронавирус аниқланганини маълум қилганди. Вилоят Санитария ва эпидемиология осойишталик маркази бош врачи Собир Муродов ҳам мазкур маълумотни тасдиқлаганди. Бироқ Қашқадарё вилояти Санитария-эпидемиологик осойишталик маркази вилоятда 855 нафар ўқитувчи коронавирусга чалинганини рад этди.
Шунингдек, Бухоро вилоятида 13 сентябрь ҳолатига 239 нафар мактаб ўқитувчиси ва техник ходими коронавирусга чалингани аниқланганди. Вилоят ҳокими ўринбосари Мирали Ҳамроев эса бу хабарни рад этди.
Эслатиб ўтамиз, Президент Шавкат Мирзиёев коронавирус бўйича «ҳақиқий рақамларни яширишга уриниш жиноий жавобгарликкача бўлган қатъий чораларга олиб келиши мумкин»лигидан огоҳлантирганди.
Изоҳ (0)