Ўзбекистон ва Қозоғистон ўртасида янги авиайўналиш очиш режалаштирилмоқда

Қозоғистон ва Ўзбекистон вакиллари Ақтау ва Урганч ўртасида авиақатновларни очиш масалаларини муҳокама қилди, деб хабар бермоқда «Sof.uz».

Музокаралар Хоразм вилояти ҳокимининг Туризм ва спорт масалалари бўйича ўринбосари Т.Давлетов ҳамда Манғистау вилояти инвестициялар ва туризмни ривожлантириш бошқармаси бошлиғи Нурбек Айтжанов ўртасида олиб борилди.

Маълум қилинишича, парвозлар ҳафтасига икки марта амалга оширилади. Ақтау—Урганч рейсини очиш масаласи Хоразм ва Манғистау вилоятлари ҳокимликлари, шунингдек, икки мамлакат авиакомпаниялари вакиллари иштирокида 17 сентябрь куни ўтказилган видеоконференцияда муҳокама қилинган. Йўналиш Буюк ипак йўли лойиҳаси доирасида ишлаб чиқилган.

Қозоқ ОАВлари ёзишича, Манғистау вилояти раҳбарияти номидан биз Қозоғистон ва Ўзбекистон ўртасидаги барча соҳалардаги ҳамкорликни фаоллаштириш ва янада ривожлантириш учун доимий рейсларнинг очилишини қўллаб-қувватлаймиз. Шаҳарлар ўртасидаги парвоз Ўзбекистон томонининг тайёрлигидан сўнг амалга оширилади, деган Нурбек Айтжанов.

Ақтаудаги Ўзбекистоннинг бош консули Нодиржон Турғунов ҳам бу икки мамлакат ўртасида туризм ривожига ижобий таъсир кўрсатишини таъкидлаган.

«Турк дунёси тарихига қизиқувчилар Истанбул орқали Ақтауга учишлари мумкин, Ақтаудан Урганчга боришлари, Хива гўзаллигини кўришлари, кейин Бухоро, Самарқанд, Тошкент, Туркистон ва Урумчига боришлари мумкин. Ушбу йўналиш бизнинг йўловчиларимизда катта талабга эга бўлади», - деди Ақтау халқаро аэропорти бошқаруви раиси ўринбосари Меруерт Жолдибаева.

Шунингдек, Қозоғистон ва Ўзбекистоннинг тарихий шаҳарларини қамраб оладиган қўшма сайёҳлик йўналишлари ва дастурларини ишлаб чиқиш таклиф қилинган.

Эслатиб ўтамиз, Қозоғистон билан мунтазам авиақатновлар 11 сентябрдан расман тикланганди.