Америкалик рассом Лениннинг жасадини АҚШга кўчириб ўтказиш учун 1 млрд доллар йиғишни таклиф қилди

АҚШнинг Нью-Йорк шаҳрида яшовчи рассом Дэвид Датуна Вашингтон шаҳрида Қизил майдондаги мақбаранинг нусхасини қурмоқчи эканлигини маълум қилди. Бу ҳақда «Коммерсантъ» хабар берди.

Шу билан бирга, рассом Владимир Лениннинг жасадини сотиб олиш ва уни мақбаранинг нусхасига кўчириб ўтказиш истагида. Датуна Лениннинг жасади учун дастлабки тўлов сифатида 1 миллион доллар таклиф қилган ва лойиҳа учун 1 миллиард доллар йиғмоқчи эканлигини билдирган.

«Россия — аллақачон ўз императорига эга империя. Америка коммунизм ва социалистик ғоялар томонга ҳаракатланмоқда», — дея маълум қилган рассом. Унинг фикрига кўра, коммунизм белгилари АҚШга кўпроқ керак, чунки улар 2020 йилда талаб пайдо бўлган ўзгаришларнинг рамзи ҳисобланади. Датунанинг қайд этишича, «иккинчи мақбарани қуриш қийин эмас, бироқ Ленинни алмаштиришнинг иложи йўқ».

Россия Коммунистик партияси аъзоси, Давлат думаси депутати Александр Юшенконинг айтишича, Ленинни Қизил майдонга дафн этиш — Совет Иттифоқи Коммунистик партияси қурултойининг қарори, шунинг учун бундай таклифларни «муҳокама қилиш ҳам мумкин эмас». «Шунинг учун мен ушбу рассомни ҳайкалтарошлик, бадиий қарашидан фойдаланиб, бир қатор ёдгорликларни яратиш ва уларни Америка шаҳарлари марказий майдонларига ўрнатишни тавсия қиламан», — дея таклиф берган депутат.

Дэвид Датуна — келиб чиқиши грузин бўлган АҚШ фуқароси. Унинг сўнгги машҳур иши Мауритсио Каттелананинг «Комедия устаси» санъат объекти — деворга ёпиштирилган банан билан 2019 йилда юз берган воқеа бўлган. Арт Басел ярмаркасидаги кўргазмаларнинг бирида Датуна 120 минг долларга сотилган бананни юлиб олган ва уни еб қўйган.

Россия меъморлари иттифоқи 12 сентябрь куни Қизил майдондаги мақбарани эксплуатация қилиш бўйича ғоялар танловини эълон қилди. Ғоялар келажакда Владимир Лениннинг жасади дафн этилганида ишлатилиши мумкин эди. Танлов ташкилотчилари, хусусан, Шусев архитектура музейининг филиали сифатида мақбара биносидан фойдаланишни ва у ерда мақбара қурилишига бағишланган кўргазмани жойлаштиришни таклиф қилди. Россия Коммунистик партияси раҳбари Геннадий Зюгановнинг танқидларидан сўнг Россия меъморлари иттифоқи танловни бекор қилди.