Россиялик олим, Нью-Жерсидаги Ратгерс университети профессори Сергей Эрофеев сиёсатчи Алексей Навальний Нобель мукофотига номзод қилиб кўрсатилганини маълум қилди. Бу ҳақда Meduza хабар бермоқда.
Унинг айтишича, ушбу мукофот учун Навальний номзодини «Россия билан шуғулланувчи таниқли университетларнинг бир қатор профессорлар илгари сурган. Эрофеев уларнинг аниқ кимлигини айтмаган, лекин «Дожд» нашрига берган изоҳда унинг номзодини кўрсатганлар орасида «катта одамлар» борлигини қайд этган.
Германия ҳукумати маълумотларига кўра, Алексей Навальний Россияда «Новичок» турига кирувчи модда билан заҳарланган. У икки ҳафтадан ортиқ вақт давомида комада ётди, айни пайтда Берлиндаги «Шарите» клиникасида даволанишни давом эттирмоқда.
Россия ҳукумати сиёсатчидан дастлаб касалхонага ётқизилган Омскда олинган тестларда заҳар борлигини кўрсатмаганини қатъий таъкидламоқда.
Мавзуга доир: Владимир Путин Навальнийнинг заҳарланиши билан боғлиқ вазият холис тафтиш қилиниши тарафдори эканини билдирди
Шу вақтда қадар бирорта ҳам Россия фуқароси Нобель мукофотига сазовор бўлмаган. СССР даврида мукофот Андрей Сахаров (1975 йил) ва Михаил Горбачёвга (1990 йил) берилган.
Эслатиб ўтамиз, Германия канцлери Ангела Меркель Россия ҳукумати Навальний заҳарланиши билан боғлиқ жиддий саволларга жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона иш» деб атади. Вашингтон айбдорларга нисбатан молиявий чекловлар қўллашга ваъда берди.
Изоҳ (0)