Инсон вазни нафақат тўғри овқатланиш, балки турмуш тарзи ҳамда саломатлик билан ҳам чамбарчас боғлиқ. Агар ким ўзига мос вазн йиғишда муваффақиятга эришишни истаса, тўғри овқатланиш мутахассиси, спорт мураббийи, шунингдек, шифокор билан ҳам маслаҳатлашиши зарур. Сабаби улар вазн ташлашда қўл келадиган ўзига хос сирлардан хабардор.
Соғлиқ учун истеъмол қилинаётган дори воситалари вазнга таъсир қилиши мумкин
Гипертония, қандли диабет, тушкунлик ва бошқа кенг тарқалган касалликларга қарши қабул қилинаётган дори воситалари вазн ортишига сабаб бўлиши мумкин. Агар вазн йўқотишда қийинчиликлар пайдо бўлса, шифокорлар ана шундай дорилар ўрнига семиртириб юбормайдиган, муқобилини тавсия этади.
Парҳездан аввал қалқонсимон безни текшириш керак
Қалқонсимон без инсон вазнига бевосита таъсир қилади, ҳатто модда алмашинуви жараёнига ҳам ўзгаришлар киритади. Мутахассисларнинг огоҳлантиришича, агар вазн орттириш ёки камайтиришда натижа кутилганидек бўлмаса, қалқонсимон без гормонларининг кенгайтирилган таҳлилини ўтказиш зарур. Натижаларни баҳолашда одатдагидек эмас, балки оптимал параметрларга эътибор қаратиш керак.
Спиртли ичимликлар вазн ташлашга халақит беради
Спиртли ичимликларнинг барча турдагиси танада модда алмашинувига таъсир қилади. Бундан ташқари, унинг таркибида енгил углеводлар мавжуд бўлиб, инсулин моддаси туфайли қандли диабет касаллигини ҳам келтириб чиқаради. Умуман, спиртли ичимликлар тананинг ҳар бир аъзосига ўз зарарини етказади.
Спортсиз вазн йўқотиш мумкин эмас
Ортиқча вазндан халос бўлиш учун инсон саломатлиги ҳамда модда алмашинуви жараёни меъёрда ишлаш керак. Албатта, жисмоний машқларсиз бунга эришиш мумкин эмас. Шифокорлар уй шароитида амалга ошириладиган машғулотларни мунтазам бажаришни тавсия этади. Шунингдек, вазн камайтириш учун спорт залларига бориш шарт эмас.
Меъёрдаги қоматнинг калити – соғлом уйқу
Мукаммал вазн учта устунга асосланган. Улар соғлом овқатланиш, жисмоний фаоллик ва етарли уйқу. Кунига 8 соатдан кам ухлаш натижасида очлик ҳисси учун жавобгар бўлган грелин гормони даражаси ортади. Бундан ташқари, уйқунинг етишмаслиги хатти-ҳаракатларга ҳам ўз таъсирини ўтказади. Вазн камайтиришни истаганлар ишни уйқуни меъёрлаштиришдан бошлаши керак.
Мушак оғирлигидан хавотир олмаслик лозим
Спорт билан фаол шуғулланган инсонларда нафақат вазн камайиши, балки ортиши ҳам кузатилади. Аслида бу яхши натижа, сабаби танада пайдо бўлган мушаклар ўз оғирлигига эга бўлади ҳамда улар модда алмашинувини яхшилайди. Мушаклар қанча кўп бўлса, шунча кўп калория энергияга айланади. Шуни ҳам ёдда тутиш керакки, 30-40 ёшлар орасида мушак массасининг табиий пасайиши кузатилади. Аммо уларни сақлаб қолиш учун кўпроқ жисмоний ҳаракат қилиш тавсия этилади.
Изоҳ (0)