Осиё Чемпионлар Лигаси 4-туридан ўрин олган «Пахтакор» — «Ал-Ҳилол» учрашуви олдидан тошкентликлар бош мураббийи Шота Арвеладзе ва жамоа футболчиси Жалолиддин Машарипов матбуот анжуманида қатнашди.
Ўйинга имкон қадар яхши тайёрланишга интилдик. Яхши дам олган ҳолда, машғулотда ишлаш орқали йигитларни ҳозирлаяпмиз. Ўйингача яна бир машғулот ўтказамиз. Ҳар уч кунда ўйнаганда деярли бир хил ҳолатда ишлашга тўғри келади.Ҳар бир ўйин бошқача кечади. Бир ўйиндаги нарсаларни бошқа беллашувда айнан такрорлай олмайсан. Биз тартиблироқ ва яхшироқ ўйин кўрсатишимиз керак. Рақибга гол уриш учун имкониятлар бермаслик зарур. Ҳар бир ўйиндан буни ўрганамиз. Йигитларга ишонаман, улар тез, техник, ҳужумкор футбол ўйнай олади. Ҳимояда ҳам бирдам ўйнаймиз. Иштирокимизни нафақат кейинги учта ўйин, балки, ундан кўпроқ беллашувларда давом эттиришни истаймиз.
Биринчи ўйинда бўлим охирларида ҳушёрликни йўқотдик деб айта олмайман. Биринчи голда кичик хато қимматга тушди. Жарима зарбасини ўнг оёқда тепадиган футболчи ижро этаётганда очиқ бурчакка бўйи узунроқ ўйинчиларни қўйиш керак эди. Лекин Жовинко даражасидаги футболчилар бир сонияда ўйин тақдирини ҳал қилиши мумкин. «Ал-Ҳилол» — кучли жамоа, улар «Фламенго»дек жамоа билан ҳам сифатли футбол кўрсатган.
Бундай даражадаги ўйинларга 7-8 дақиқа қўшилганда бир футболчи кам бўлсанг, бу ўз таъсирини ўтказади. «Ал-Ҳилол»да индивидуал кучли футболчилар етарлича ва улар жамоа сифатида ҳам жуда яхши савияда. Улар биргаликда ҳимоявий ишларни бажаради, ҳужумга ўтади. Марказдаги футболчилар ҳужум йўналишини ўзгартиради. Осиёнинг энг кучли жамоасида ҳамма нарса юқори даражада бўлади. Жамоавий прессингга ўтишади, ҳамжиҳат ўйнашади. Дарвозабон ҳам ҳужумларни бошлаб бериши мумкин. Худди бизнинг жамоа сингари рақиб ҳам жамоавий ва индивидуал тарафдан яхши ўйнайди.
Шота Арвеладзе, «Пахтакор» бош мураббийи
Биз биринчи баҳсда мағлубиятга учраган бўлсак ҳам, йигитларда ўзига бўлган ишонч ошди. Иккинчи учрашув ҳам қизиқарли беллашув бўлади деб ўйлайман. Жамоадошларим билан бунга тайёрмиз. «Ал-Ҳилол» ҳам кучли жамоа. Улар бежизга ўтган мавсум мусобақада ғолиб чиқмаган. Кичик хатоларимизни ўрганиб чиққан ҳолда кейинги баҳсга тайёрмиз деб айта оламан.«Пахтакор» 3-турда «Ал-Ҳилол»га қарши баҳс олиб борди ва 90+7-дақиқадаги гол туфайли мағлубиятга учраганди.Ўзбекистон чемпионатида қандай кучга эга эканимизни ўтган мавсумда кўрсатиб бўлдик. Чемпионлар Лигасида 2019 йил ҳам яхши ўйнадик, аммо омадсизлик туфайли гуруҳдан чиқа олмагандик. Бу йил эътиборимиз Чемпионлар Лигасига қаратилган. Олдимизга катта мақсадлар қўйилган. Ўтган мавсум яхши даражада ўйнаганмиз. Биринчи баҳсда ҳужумларни якунлашда баъзи хатоларга йўл қўйдик. Улардан фойдаланганимизда беллашув бошқача тугаши мумкин эди. Бу сафар кичик хатолардан фойдаланишга уринамиз.
Жалолиддин Машарипов, «Пахтакор» футболчиси
Эслатиб ўтамиз, Чемпионлар Лигаси гуруҳ босқичининг қолган ўйинлари Қатарда марказлашган ҳолда ўтказилмоқда.
Мавзуга доир: Шота Арвеладзе: Чемпионлар Лигаси даражасидаги мусобақаларда савияли ҳакамлар бўлиши керак
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)