Қироллик санъати коллежининг 53 ёшли битирувчиси, британиялик рассом Гевин Терк модерн ва авангард асарлари билан машҳур бўлиб, ўзининг инсталляцияларидан бири – чиқинди солинган целлофан пакетни кимошди савдосига қўйди. Бу ҳақда «Korrespondent.net» хабар берди.
Маълумотларга кўра, сумка ичида ҳеч қандай чиқинди йўқ, аслида бу қора рангга бўялган бронза ҳайкал. Унинг нархи 65 254 долларга баҳоланган.
Бу Гевин Терк яратган оддий буюм кўринишидаги ҳайкалларнинг биринчи эмас. Масалан, унинг ижодида картон қути, бир марталик стакан, озиқ-овқат қадоқлари ва ҳатто автомобиль ғилдираги шаклидаги ҳайкални ҳам кўриш мумкин. Одатда бундай буюмларнинг нархи 25-38 минг долларни ташкил этади.
Бу сафар Терк «Чиқинди идиши» номли асарини намойиш этди. У 2000 йилдан буён шу каби чиқинди сумкаси ҳайкалтарошлиги билан шуғулланади. Теркнинг сўзларига кўра, бу сумка санъат моҳиятини англашга даъват этади. Инсонда нега чиқинди тўла бир сумкани ахлат қутисига ташлаймиз-у, бошқасини музейда сақлаймиз, деган ўйни пайдо қилади.
Изоҳ (0)