Навоийда 11 сентябрь куни соат 02:30 ларда Nexia ҳайдовчиси велосипед бошқариб кетаётган фуқарони уриб юборди. Бу ҳақда ИИВ ЙҲХББ ахборот хизмати хабар берди.
Маълумотларга кўра, Хатирчи тумани «Алишер Навоий» МФЙ ҳудудидан ўтган 4Р-56 автомобиль йўлининг 20-километрида 23 ёшли Nexia ҳайдовчиси автомобилни бошқариб кетаётиб, қаршисидан маст ҳолда ҳаракатланиб келаётган 51 ёшли велосипедчини уриб юборган.
Оқибатда велосипед ҳайдовчиси оғир тан жароҳатлари олиб шифохонада вафот этган.
Мазкур ЙТҲ юзасидан Хатирчи тумани ИИБ ҳузуридаги Тергов бўлими томонидан Жиноят кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.
Аввалроқ Наманганда Matiz ҳайдовчиси велосипед бошқариб кетаётган фуқарони уриб юборгани, Навоийда юк машинаси ва велосипед тўқнашиши оқибатида 65 ёшли велосипедчи воқеа жойида вафот этгани тўғрисида хабар берилганди.
Изоҳ (0)