Қашқадарёда юк машинаси ва Nexia тўқнашиши натижасида 6 яшар қизалоқ ҳалок бўлди

Қашқадарё вилоятида юк машинаси Nexia’га урилиши натижасида 6 ёшли қизча вафот этди, дея хабар бермоқда ЙҲХББ.

Маълум қилинишича, 2020 йилнинг 12 сентябрь куни соат 11:30 ларда Қашқадарё вилояти Нишон тумани ҳудудидан ўтган 4К-333 Нишон–Грес автомобиль йўлининг 5-километрида ҳайдовчи 1994 йилда туғилган О.Қ. ГАЗ-5327 юк автомобилини бошқариб кетаётиб, йўлнинг ўнг томонидан кетаётган пиёдани уриб юбормаслик мақсадида қарама-қарши йўлга чиқиб кетган.

Натижада қаршисидан келаётган ҳайдовчи, 2000 йилда туғилган Ш.Т. бошқарувидаги Nexia русумли автомобиль билан тўқнашган.

Оқибатда Nexia йўловчиси 6 ёшли Ш.У. оғир тан жароҳатлари олиб воқеа жойида вафот этган. Ушбу автомобиль йўловчилари 24 ёшли Ш.А. ва 69 ёшли М.А. тан жароҳати олиб шифохонага ётқизилган.

Мазкур ЙТҲ юзасидан Нишон тумани ИИБ ҳузуридаги Тергов бўлими томонидан терговолди суриштирув ҳаракатлари олиб борилмоқда.