Хитойнинг Weibo ижтимоий тармоғида Xiaomi’нинг Redmi Note 10 номи остидаги янги смартфони суратлари пайдо бўлди. Компания Redmi Note 9 версиясини беш ой олдин тақдим этганига қарамай, смартфон тақдимоти тез орада бўлиб ўтиши керак.

Фото: Twitter

Смартфон стандарт дизайнга эга бўлган — шиша қопқоқ ва ингичка ҳошияли дисплей, бурчак қисмида фронтал камера жойлашган. Манбанинг таъкидлашича, у IPS матрицага эга бўлади, шу сабабли бармоқ изи сканери ён томонга жойлаштирилиши мумкин. Шунингдек, Redmi Note 10 асосий модули 48 мегапикселлга тенг учталик камера билан жиҳозланади.

Смартфоннинг техник тавсифи ҳақида ҳозирча аниқ маълумотлар мавжуд эмас. Миш-мишларга кўра, у MediaTek Dimensity 820 процессори ва 8 гигабайт тезкор хотирада ишлайди. Redmi Note 10 Xiaomi смартфонлари орасидаги 5G алоқа тармоғини қўллаб-қувватловчи энг ҳамёнбоп қурилмага айланиши керак.

Redmi Note 10 тақдимоти ва унинг нархи ҳақида аниқ маълумотлар мавжуд эмас. Бироқ Redmi Note 9 моделининг нархи 260 доллар атрофидалиги ҳисобга олинса, янги смартфон нархи ҳам шунга яқин бўлади.

Аввалроқ Xiaomi компанияси камераси экран остидан жой олган смартфон оммавий ишлаб чиқарилишини маълум қилганди.