Пахта терими мавсумида ишчилар ўртасида касаллик тарқалишининг олдини олиш учун ҳар 100 нафар теримчига бир нафар ҳамшира бириктирилади. Бу ҳақда 2020 йил 5 августда АОКАда бўлиб ўтган матбуот анжуманида вазир ўринбосари Баҳодир Умрзоқов маълум қилди.
«Пахта теримида пандемия шароитлари бўйича алоҳида низом тасдиқланган. Унда ҳар бир ишчи эрталабдан ҳолати ўрганилиши, ишга чиқаётганида ва келаётганида иссиғи ўлчаниши, иш жараёнида гигиена қоидаларига риоя қилиниши каби қоидалар киритилган. Агарда иш жараёнида касаллик аломатлари аниқланса, керакли дори-дармонлар билан таъминланади. Мана шу жараёнларни назорат қилиш учун эса, Давлат меҳнат инспекцияси ходимлари ишлашади», — деди – Бандлик ва меҳнат муносабатлари вазири ўринбосари Баҳодир Умрзоқов.
Давлат меҳнат инспекцияси раҳбари Қудратилла Одинаевнинг айтишича, ишчилар меҳнатини муҳофаза қилиниши, улар ўртасида санитария қоидаларига риоя қилиниши техник инспекторлар тегишли тартибда назорат қилади. Айниқса, пахта теримига узоқдан келган теримчиларга катта эътибор берилади ва бунинг учун 104 нафар ходим ажратилган.
Изоҳ (0)