Фарғона вилоятида ОТМларга кириш имтиҳонларининг дастлабки тўрт кунида 40 нафар абитуриент имтиҳонга уяли телефон, қўлбола электрон қурилма ёки «шпаргалка» олиб киришга урингани учун тест синовидан четлаштирилди. Бу ҳақда «Дарё» мухбири хабар берди.
Вилоят ИИБ ахборот хизматининг маълум қилишича, такрорий огоҳлантиришларга қарамасдан, абитуриентлар томонидан имтиҳонга ўзлари билан турли электрон қурилмалар — мобил телефонлар, микрокалкульяторлар, қулоқчин, электрон соатлар, турли «шпаргалка»ларни олиб кириш ҳолатлари кузатилмоқда.
2020 йил тест синовлари вилоятдаги «Истиқлол» ҳамда «Нефтчи» стадионлари, Фарғона давлат университети спорт мажмуаси, Марғилон шаҳридаги болалар ва ўсмирлар спорт мактаби, Қўқон шаҳридаги ва Сўх туманидаги марказий ўйингоҳларда ўтказилмоқда.
Мазкур стадионларда абитуриентлар учун 7 170 та жой тайёрланган. Кириш имтиҳонларида 122 минг нафардан зиёд абитуриент иштирок этади.
Тест синовлари кунига икки мартобадан ташкил этилиб, имтиҳонларга бир кунда 14 340 нафар абитуриент қатнашиши кўзда тутилган. Тест синовлари ўтказиладиган марказий стадионларга кузатув камералари ўрнатилиб, имтиҳон жараёнлари онлайн трансляция қилинмоқда.
Имтиҳонлар вақтида барча абитуриентлар етарли миқдорда қадоқланган ичимлик суви, ручка, антисептик воситалар, тиббий қўлқоп ҳамда ниқоб билан таъминланмоқда.
Давлат тест маркази Фарғона вилояти бўлими бошлиғи Исмоил Шокировнинг маълум қилишича, вилоятда тест синовларини 10 кунда якунлаш режалаштирилган. Сўх туманида эса олий таълим муассасаларига кириш имтиҳонлари 2—3 сентябрь кунлари ўтказилган.
Қайд этилишича, абитуриентларга қулайлик яратиш мақсадида вилоят ҳудудида бепул автобуслар қатнови йўлга қўйилган. Шаҳар-туманлар марказларида махсус «Абитуриентлар бекати» ташкил этилган. Вилоят ҳокимлиги кўмагида 300 та автобус ажратилиб, ички ишлар бошқармаси ва шаҳар-туманлар ҳокимликлари ҳамкорлигида абитуриентлар ўз вақтида имтиҳонлар ўтказиладиган стадионларга етказилмоқда. Тест синовлари якунига етгач, барча абитуриентлар яна ўз манзилларига етказиб қўйилади.
Фарғона шаҳар ҳокимининг фармойишига асосан 2 сентябрдан бошлаб имтиҳонлар бўлиб ўтадиган спорт мажмуалари ва ўйингоҳлар олдидаги кўчаларда транспорт воситаларининг ҳаракати вақтинча тўхтатилган.
Изоҳ (0)