«Бошқа вилоятга бориб пахта терувчиларнинг ҳар бирига 500 минг сўмдан молиявий ёрдам берилади» — Баҳодир Умрзоқов

АОКАда 5 сентябрь куни қатор вазирлик расмийлари иштирокида пахта мавсумига тайёргарлик ва мажбурий меҳнатнинг олдини олиш масалаларига бағишланган матбуот анжумани ўтказилди. Унда ОАВ вакилларининг ўнлаб саволларига жавоб қайтарилди.

Тадбирда Бандлик ва меҳнат муносабатлари вазири ўринбосари Баҳодир Умрзоқовнинг таъкидлашича, бу йилги пахта йиғим-терими мавсумида мажбурий меҳнатни йўқ қилиш, болалар меҳнатига барҳам бериш бўйича тегишли чоралар кўрилмоқда.

«Пахта терими оғир жисмоний меҳнат жараёни бўлгани учун буни ташкилий-ҳуқуқий ва молиявий томонларини ҳукуматимиз ҳар томонлама ўрганди ҳамда бу борада янги принципиал тарзда иш ташкил қилиш масаласи қўйилди.

Биринчидан, пахта терадиган ёлланма ишчиларнинг ҳеч бири шартномасиз пахта даласига чиқмайди. Бунинг учун Бандлик ва меҳнат муносабатлари вазирлиги, Касаба уюшмалари федерацияси, Савдо-саноат палатаси ўртасида қўшма ҳужжат имзоланди ва унга асосан низом ишлаб чиқилди. Пахта терими мавсумига ҳашар сифатида қаралмайди. Жараёнга шартнома асосида кўнгиллилар жалб қилинади. Етиштирилган пахтани қонуний тартибда териб олиш чоралари кўрилади.

Иш берувчи ва ёлланма пахта терувчи ўртасида тенг ҳуқуқли муносабат белгиланган. Бу борада қатор тегишли ташкилот вакиллари меҳнатни муносиб шароитларига эътиборни кучайтиради. Жараёнда касал бўлиб қолиш, шикаст олиш каби ҳолатларнинг олдини олишимиз зарур.

Иккинчидан, пахта теримида қатнашадиганлар икки гуруҳга бўлинади. Яшаш жойидаги пахта теримида қатнашувчилар ва бошқа вилоят, туманларга бориб жараёнда иштирок этувчи теримчилар. Барча маълумотлар янги ташкил қилинган terim.uz сайтига жойлаштириб борилади.

Учинчидан, ҳар бир ёлланма ишчилар бригадаларга бўлинади. Ҳар бир бригада 50-70 кишидан иборат бўлади. «Ўз ҳудудимда пахта тераман», деганларга алоҳида молиявий муносабат, «Йўқ, бошқа узоқ вилоятга бориб, тераман», дея бригадалар таркибига кирганларнинг ҳар бирига 500 минг сўмдан молиявий ёрдам берилади. Терган пахтасига эса алоҳида белгиланган нархда пул олади», деди Баҳодир Умрзоқов, дея унинг сўзларини келтирмоқда «Дарё» мухбири Миролим Исажонов.

Вазир ўринбосарининг қўшимча қилишича, бошқа ҳудудга борадиган теримчилар учун барча шароитлар яратилади. Ётоқ жой, овқатланиш ва бошқа масалалар талаб даражасида бўлади. Шартномаларни расмийлаштириш жараёни маҳаллий бандлик марказлари, маҳалла ва оилани қўллаб-қувватлаш бўлимлари ходимлари ҳамда маҳалла вакиллари иштирокида амалга оширилади.