АҚШ президенти Дональд Трамп раҳбариятида демократлар ўтирган шаҳарлардаги тартибсизликларни фақат куч ёрдамида тўхтатиш мумкинлигини айтди. Бу ҳақда у Twitter’даги саҳифасида ёзиб қолдирди.
«Демократлар томонидан бошқариладиган, жиноятчилик юқори бўлган шаҳарлардаги зўравонликларни тўхтатишнинг ягона йўли — бу куч!» — деб ёзган Дональд Трамп.
Президент, шунингдек, демократлардан бўлган Портленд мэри Тед Уиллерни шаҳардаги тартибсизликлар вақтида ҳеч қандай чора кўрмаганликда айблади. «Ҳеч нима қилмаётган Портленд мери, одамлар ўлиши ва ўз шаҳрининг вайрон бўлаётганини жим кузатаётган демократ, бундай ноқонуний вазият чексиз давом этиши керак деб ҳисобламоқда. Бу хато!», — деган Трамп ва Уиллерни «ақлдан озган» ва «сўл радикалчи» деб атаган.
Трампнинг айтишича, Портленд ва АҚШнинг бошқа шаҳарлари аҳолиси «қонун ва тартиб» хоҳламоқда шаҳар раҳбарлари — Демократик партия тарафдорлари эса буни таъминлаб бера олмайди.
АҚШда доимий равишда ирқчилик ва полиция зўравонлигига қарши намойишлар бўлиб туради. Сўнгги йиллардаги энг йирик намойишлар 2020 йил май ойининг охирида Жорж Флойднинг ўлимидан кейин юз берган кўча намойишлари бўлди. Намойишлар мамлакатнинг кўплаб шаҳарларида Black Lives Matter ( «Қора танлиларнинг ҳаёти муҳим») ҳаракати доирасида бўлиб ўтди.
Асосан тинч намойишлар бўлиб ўтди, бироқ баъзи намойишларда дўконларга ҳужумлар ва колония даври ёдгорликларига зарар етказиш кузатилди. Намойишчиларнинг полиция билан тўқнашувлари ҳам бўлиб ўтди. Кейинроқ Black Lives Matter ҳаракати ва ирқчиликка қарши норозликлар дунёнинг бошқа мамлакатларига ҳам тарқалди.
Янги оммавий норозилик 23 август куни Висконсин штатидаги Кеноша шаҳрида икки нафар полициячи 29 ёшли қора танли эркакка унинг болалари олдида 7 марта ўқ узганидан кейин бошланди, одамлар автосалон ва автомобилларни ёқиб юборган.
Изоҳ (0)