Австралия пойтахти Канберра шаҳрида коронавирусга қарши вакцинанинг клиник синовлари бошланди. Вакцина АҚШнинг Novavax компанияси томонидан ишлаб чиқилган. Бу ҳақда «Korrespondent.net» хабар берди.
Таъкидланишича, 80 нафар кўнгилли вакцинани қабул қилади, яна шунча кўнгилли эса плацебони. Бир вақтнинг ўзида Австралия ва АҚШда бўлиб ўтадиган кенг қамровли синовларда жами 1,5 минг нафар кўнгилли қатнашади ва ҳар бир мамлакатга 750 кишидан тўғри келади.
Синовларда иштирок этадиган дастлабки қатнашчилар Канберрадаги олий ўқув юртларининг ходимлари ва талабалари ҳисобланади.
«Вакцинани қабул қилган синов гуруҳи — канберралик кўнгиллилар. Ҳудудда деярли икки ойдан буён коронавирус билан касалланиш бўйича бирорта ҳам янги ҳолат қайд этилмагани сабабли мазкур шаҳар танланган. Улар препаратни қабул қилганидан буён кўп вақт ўтмади, бироқ ҳозирча биз ҳеч қандай салбий таъсирларни кўрмаяпмиз», — дея маълум қилган тадқиқот маркази вакили Мэтт Клэйси.
Мутахассисларнинг қайд этишича, препаратни қабул қилганлардан ҳеч ким соғлиғи юзасидан шикоят қилмаган бўлса ҳам, вакцинани ишчи деб ҳисоблашга вақтли. Синовларнинг биринчи босқичида шифокорлар вакцина хавфсиз эканлигига ишонч ҳосил қилиши керак.
«Синалаётган вакцина икки қисмдан ташкил топган, улардан бири вирус генетик материалининг кичик қисми ҳисобланади. Шу сабабли эмланганда организм вирусни эмас, балки унинг изини қабул қилади. У эса хавф манбайини танишга ва унга иммунитет жавобини тайёрлашга имкон беради. Вакцинанинг иккинчи қисми бу жавобни кучайтирувчи препарат ҳисобланади», — дея тушунтириш берган Клэйси.
Мутахассиснинг билдиришича, ҳозирча препаратни 49 нафар кўнгилли қабул қилган, қолганлар эса тажрибада иштирок этишдан олдинги якуний тиббий кўрикдан ўтмоқда. Биринчи эмлашдан кейин олти ой ўтгач иккинчи эмлаш амалга оширилади. Кейин эса шифокорлар коронавирусга қарши иммунитет ҳосил бўлиши ва унинг барқарорлигини кузатиши учун кўнгиллилар ҳар олти ойда таҳлил топширади. Синовларнинг оралиқ натижалари 2020 йилнинг охирида маълум бўлади.
Аввалроқ Қозоғистон ҳукумати COVID-19’га қарши вакцинанинг клиник синовларига рухсат бергани ҳақида хабар қилинганди.
Россия президенти Владимир Путин коронавирусга қарши яратилган биринчи вакцина «Спутник V»ни олган қизи ўзини яхши ҳис қилаётганини маълум қилганди.
Шунингдек, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги хабар қилинди.
Изоҳ (0)