COVID-19 билан касалланган Ҳиндистоннинг собиқ президенти Пранаб Мукержи 84 ёшида вафот этди. Бу ҳақда «Интерфакс» хабар берди.
«Ўгир қайғу билан сизларга маълум қиламанки, касалхона шифокорлари ва бутун Ҳиндистондаги одамларнинг дуоларига қарамасдан, отам Шри Пранаб Мукержи ҳозиргина вафот этди», — деб ёзган собиқ президентнинг ўғли ўзининг Twitter’даги саҳифасида.
Ҳиндистон бош вазири Нарендра Моди собиқ президентнинг вафоти муносабати билан ҳамдардлик билдирган. «Ҳиндистон Пранаб Мукержининг ўлими сабаб мотам тутмоқда. У мамлакатимиз ривожи йўлида ўчмас из қолдирди. Ажойиб олим, етук давлат арбоби, ундан бутун сиёсий соҳанинг вакиллари ва жамиятнинг барча қатлами илҳом олди», — дея ёзган Моди Twitter’да.
Шунингдек, Нарендра Моди 2014 йилда бош вазир лавозимига киришганда Мукержи уни қўллаб-қувватлагани учун миннатдорлик билдирган.
Мукержи 10 август куни касалхонага ётқизилган, ўша куни унинг бош миясида тромбни олиб ташлаш бўйича операция ўтказилган. Шунингдек, касалхонада унда коронавирус борлиги ҳам аниқланган. Шифокорларнинг маълум қилишича, сўнгги кунларда Мукержида пневмония ва буйракнинг ишдан тўхташи кузатилган.
Пранаб Мукержи 2012—2017 йилларда Ҳиндистон президенти лавозимини эгаллаган.
Изоҳ (0)