Латвия, Литва ва Эстония Ташқи ишлар вазирликлари «ўз шахсий ҳаракатлари билан президентлик сайлови натижаларини сохталаштиришни уюштирган ва тинч намойишларни зўравонлик билан бостиришни қўллаб-қувватлаган» беларуслик мансабдор шахсларга нисбатан санкциялар жорий қилинганини маълум қилди. Бу ҳақда Meduza хабар берди.
Александр Лукашенко бошчилигидаги 30 кишига номаълум муддатга persona non grata мақоми берилган. Шунингдек, рўйхатга Беларусь президенти аппарати ва маъмурияти, мамлакат Марказий сайлов комиссияси, Ички ишлар ва Адлия вазирликлари, Бош прокуратура, Тергов қўмитаси, Давлат хавфсизлик қўмитаси, Хавфсизлик кенгаши ва бошқа идоралар вакиллари киритилган.
Латвия, Литва ва Эстония Европа Иттифоқини зудлик билан беларуслик мансабдорларга нисбатан худди шундай чоралар қўллашга чақирган.
Аввалроқ Европа парламенти Лукашенкога persona non grata мақомини берганди ва Москвадан Беларусь ишларига аралашмасликни сўраганди.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди.
Александр Лукашенко 23 август куни норозилик намойиши иштирокчилари қаршисида қўлида автомат билан пайдо бўлди. Зирҳли нимча кийиб олган президент вертолётда Минскдаги норозилик намойишларини кузатганди. Кейинроқ у ўз халқига автоматдан ўқ отмаслигини айтди.
Бироқ 30 август куни Минскда «Тинчлик ва мустақиллик марши» номи остида норозилик намойишлари бошланди. Унинг иштирокчилари мамлакат президентининг қароргоҳи жойлашган Мустақиллик майдонига қадар келган. Бино «ОМОН» отрядлари ва ички қўшин бўлинмалари билан қуршаб олинган. Шу куни Лукашенко яна бир бор зирҳли кийим ва қўлида автомат билан Мустақиллик саройи қаршисида кўриниш берган.
Изоҳ (0)