Ливан президенти Мишель Аун мамлакатдаги сиёсий тизимни ўзгартириб, ҳокимиятни шакллантиришнинг фуқаролар урушидан қолган конфессионал принципидан воз кечишга ва Ливанни дунёвий давлатга айлантиришга чақирди, деб хабар бермоқда «РИА Новости».
Бундай баёнотни у Буюк Ливан давлати ташкил этилганининг 100 йиллиги муносабати билан мамлакатда давом этаётган инқирозлар ҳамда Ливан пойтахтининг ярмини вайрон қилган ва 190 кишининг ўлимига сабаб бўлган Байрут портидаги портлаш оқибатида юз берган фожиа фонида айтди.
«Мен Ливанни дунёвий давлат деб эълон қилишга чақираман ва конституцияда акс этадиган ҳаммага маъқул бўлган аниқ ифодага келиш учун сиёсий ва диний етакчиларни мулоқотга чорлайман. Ливан ундаги ишларни бошқаришда давлатнинг фуқаролиги ва дунёвийлигига асосланган янги тушунчага муҳтож», — деган Аун. Унинг нутқи Ливаннинг бир неча телеканаллари орқали тўғридан-тўғри эфирга узатилган.Ливан президентининг таъкидлашича, ҳокимиятнинг конфессионал белгиларига кўра бўлингани туфайли Ливан бир эмас, бир неча республикалардан иборат.
Эслатиб ўтамиз, Ливан пойтахти Байрут шаҳридаги портда 4 август куни кучли портлашлар юз берди. Мазкур ҳодисадан кейин Байрутда оммавий намойишлар бошланди ва намойишчилар мамлакат ҳукуматини истеъфога чиқишга чақирди. Уларнинг фикрича, айнан мамлакат расмийлари портда аммоний нитрати сақланиши шароитларини таъминламагани сабабли юз берган портлашлар учун жавобгар ҳисобланади. Оммавий намойишлар сабабли Ливан ҳукумати истеъфога чиқишга қарор қилди.
Изоҳ (0)