Озарбайжон ҳукуматининг мамлакат ҳудудида алоҳида карантин режимини 30 сентябрга қадар узайтириш тўғрисидаги қарори кучга кирди. Бу вақт оралиғида мамлакат чегаралари ёпиқлигича қолади, деб хабар беради «ТАСС».
Мамлакатда эпидемиологик вазият яхшиланганига қарамай, 29 август куни ҳукумат «муваффақиятларни мустаҳкамлаш»ни зарур деб топган.
Озарбайжонда эпидемия ўз чўққисига ёз бошларидан чиққан эди. Коронавирус билан касалланиш бўйича кунлик энг юқори кўрсаткич 590 кишини ташкил этган — 24 июнда қайд этилган. Июнь охирларига келиб, уч ҳафта давомида ҳар куни 500 дан ортиқ янги касалланиш ҳолатлари аниқланган. 16 июлдан бошлаб мамлакатда касалликка чалиниш ҳолатлари камая бошлаган, август ўрталарида келиб эса кунлик кўрсаткич 200 кишини ташкил этган.
Ҳукумат мамлакатда кузатилаётган ижобий динамикани ҳисобга олган ва 31 августда бошлаб қаттиқ карантин режими амалда бўлган ҳудудларни камайтирган. Ҳозирда улар орасида Боку ва Сумқайит шаҳарлари, шунингдек, пойтахтга яқин Абшерон тумани қолмоқда — бу ерда энг кўп касалланиш ҳолатлари қайд этилган. Қаттиқ карантин режими ҳудудларида дам олиш кунлари барча турдаги жамоат транспортлари тўхтатилади. Йирик савдо марказлари, театр ва кинотеатрлар ёпиқлигича қолмоқда, ресторан ва кафеларга эса фақат очиқ террасалар орқали ташриф буюрувчиларга хизмат кўрсатиши мумкин.
Мамлакатда олдингидек оммавий тадбирлар, жумладан, тўй ва дафн маросимларини ўтказиш тақиқланган, беш кишидан ортиқ инсоннинг бир жойда тўпланишига рухсат берилмайди. Мамлакат президенти маслаҳатчиси Ҳикмат Ҳажиевнинг сўзларига кўра, мамлакат чегаралари ёпиқлигича қолади, фақат халқаро юк ташиш ва экспорт рейсларига истисно мавжуд.
Сўнгги маълумотларга кўра, Озарбайжонда пандемия бошланганидан буён 36 309 кишида коронавирус аниқланган, уларнинг 33 703 нафари соғайган, 531 бемор COVID-19 қурбонига айланган.
Эслатиб ўтамиз, 21 июндан Озарбайжоннинг саккизта йирик шаҳрида, жумладан, Бокуда ҳам икки ҳафталик қаттиқ карантин бошланган эди.
Изоҳ (0)