Беларусь етакчиси Александр Лукашенконинг матбуот котиби «РИА Новости»нинг президент ҳозир қаерда эканлиги тўғрисидаги саволига унинг суратини тақдим этди.
Агентлик томонидан эълон қилинган суратда Лукашенко яна бир бор зирҳли кийим ва қўлида автомат билан Мустақиллик саройи қаршисида кўриниш берган. Тахминларга кўра, Беларусь президенти «АКС-74У» қисқартирилган автоматини кўтариб олган. Қурол моделини ўқотар қуроллар бўйича россиялик эксперт Максим Попенкер ошкор этган.
Попенкернинг сўзларига кўра, автоматнинг ушбу модели собиқ Совет иттифоқ давлатларида жуда оммалашган. У билан жанговар машина ва вертолётлар ўзини мудофаа қилиш мақсадида қуроллантирилган. Бундан ташқари, махсус хизмат ходимлари ундан яқин масофали жангларда фойдаланади.
Маълумот учун, 30 август куни Минскда «Тинчлик ва мустақиллик марши» номи остида норозилик намойишлари бошланди. Унинг иштирокчилари мамлакат президентининг қароргоҳи жойлашган Мустақиллик майдонига қадар келган. Бино «ОМОН» отрядлари ва ички қўшин бўлинмалари билан қуршаб олинган.
Эслатиб ўтамиз, Лукашенко 23 август куни ҳам норозилик намойиши иштирокчилари қаршисида қўлида автомат билан пайдо бўлганди. Зирҳли нимча кийиб олган президент вертолётда Минскдаги норозилик намойишларини кузатганди.
Изоҳ (0)