Россияда COVID-19’га қарши иккинчи вакцина — «Вектор» ҳам тезлаштирилган тартибда рўйхатдан ўтказилади

«Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкин. Гамалея институтининг «Спутник V» вакцинаси ҳам худди шу тартибда тезкор рўйхатга олинганди. Бу ҳақда «Интерфакс» хабар қилган.

«Учинчи босқич рўйхатга олиш жараёни билан параллел равишда кечади», — деган «Вектор» марказининг зооноз инфекциялар ва гриппга қарши бўлими бошлиғи Александр Рижиков.

Шунингдек, у Гамалея институтидаги вакцинада бўлгани каби рўйхатга олишгача учинчи босқич ҳам ўтказилиши ёки рўйхатга олинганидан кейин учинчи синов бўлиши мумкинлиги ҳақида берилган саволга ҳам жавоб қайтарган.

Рижиков вакцинани клиник синашнинг иккинчи босқичи амалга оширилаётганини эслатган. Унинг сўзларига кўра, 100 нафар одам ушбу клиник тестларда иштирок этмоқда. Препаратнинг иккала дозасини босқичма-босқич, муайян оралиқда қабул қилган биринчи иштирокчида COVID-19’га қарши иммунитет даражаси пайдо бўлгани кузатилган ва у стационар даволанишда чиқарилган. Олти нафар кишида инъекция юборилган жойда касалланиш содир бўлган, қолганларда шикоят кузатилмаган.

«Кузатувда бўлганларнинг ҳар бирида антитана борлиги аниқланган», — дея таъкидлаган Рижиков.

Олимнинг айтишича, вакцина организмда камида бир эпидемик мавсум учун керакли даражадаги антитана ишлаб чиқаришда иштирок этади.

«Ҳозирча тадқиқотлар якунига етмаган, шу сабабли вакцинамиз иммунитетининг давомийлиги ҳақида гапиришга ҳали эрта. Бу грипп вакцинаси давридан камроқ бўлиши ҳам мумкин», — деган Рижиков.

Шунингдек, у иммунитет фақат битта мавсум учун сақланиб туриши, «Вектор» марказида одамларни йилда бир марта қайта вакцинация қилиш, кейинчалик уч йилда бир марта эмлаш таклиф қилинаётгани ҳақида айтиб ўтган.

«Эҳтимол, бу ҳар йили амалга оширилар. Балки ўн йиллар давомида синовдан ўтган схема бўйича ишлармиз», — дейди Рижиков.

Синовларнинг ҳозирги босқичида 100 нафар кўнгиллидаги ўзгаришлар ҳақида сентябрь ўртасида ҳисобот берилади. Шифокорлар иштирокчиларни 280 суткадан кўпроқ вақт давомида ҳам кузатиши мумкин. «Вектор» вакцинаси сентябрь охири октябрь бошларида рўйхатга олиниши мумкин. Бу ҳақда Владимир Путин ўтказган йиғилишда бош вазир ўринбосари Татьяна Голикова маълумот берган.

Вакцина суспензия шаклида ампулаларда чиқарилади ва елкадаги мушаклар орасига юборилади. «Вектор» вакцинасининг дастлабки серияларини улар рўйхатга олинганидан кейин ишлаб чиқаришга киришилади. Ампула нархи ошкор этилмаган, бироқ унинг қиймати жаҳон бозоридаги нархлар билан рақобатбардош экани маълум қилинган.