Россия мактабларида янги ўқув йилидан бошлаб коронавирусдан профилактика мақсадида ягона қўнғироқ ва барча синфлар учун умумий алмашишлар бўлмайди. Бу ҳақда Россия Таълим вазирлиги маъмурияти ва назорат департаменти директори Тамара Романовага таяниб, «ТАСС» хабар берди.
Романованинг сўзларига кўра, барча мактабларда турли синфлар учун дарсларнинг индивидуал бошланиш ва якунланиш, шунингдек, мактаб ошхонасида овқатланиш вақти белгиланади.
«Бинога киришдаги қўшимча эшиклар очилади, ҳар бир синфга алоҳида хона бириктиришга ҳаракат қиламиз, бироқ ҳар бир туманнинг ўзига хослиги бор», — дейди амалдор.
Ўз навбатида «Роспотребнадзор»нинг маълум қилишича, янги ўқув йилида ота-оналарнинг мактаб биносига кириши чекланади. Ота-оналар мажлиси онлайн тартбида ўтказилади.
Аввалроқ Москвадаги мактабларда янги ўқув йили одатдагидек 1 сентябрда бошланиши, ўқувчиларнинг ниқоб тақиши ихтиёрий бўлиши ҳақида хабар берилганди.
Мавзуга доир: Ўзбекистон мактабларида пандемия шароитида ўқув йилини бошлаш бўйича қарор лойиҳаси тайёрланди
Изоҳ (0)