Россияда 2020 йилда болалар учун коронавирусга қарши вакцина пайдо бўлмайди. Бу ҳақда соғлиқни сақлаш вазири Михаил Мурашко 28 август, жума куни Бутунроссия ота-оналар мажлисида маълум қилди, деб ёзмоқда «Интерфакс».
Унинг қайд этишича, шифокорлар вакцинани кузатиш ва ўрганишни давом эттирмоқда. «Мамлакатимиз болалари учун қўшимча синов ва тадқиқотлар ўтказамиз. Вакцинанинг болалар организмига таъсири ҳақида тўлиқ тасаввурга эга бўлганимиздан кейин бу масалани кўриб чиқамиз», — дея маълум қилган Мурашко.
Вазирнинг қайд этишича, болаларда кўпинча вирус белгиларсиз ўтади, бироқ алоҳида эътибор қаратиш керак бўлган болалар гуруҳлари мавжуд.
«Улар — қандли диабетдан азият чекадиган болалар. Бу хавф гуруҳи бўлиб, улар учун профилактика тадбирлари комплексини тавсия қиламиз. Қандай қоида ва тавсияларга амал қилиш ҳақида даволовчи шифокорингиз билан маслаҳат қилиш керак», — деди Мурашко.
Шунингдек, вазир ортиқча вазнли болаларга алоҳида эътибор қаратишни сўраган, улар қўшимча хавф гуруҳи ҳисобланади.
«Албатта, бир қатор сурункали касалликлар ҳам бола учун қўшимча хавфни юзага келтириши мумкин, хусусан, улар эҳтимолий иммуносупрессив ҳолатлар ва ревматоид касалликлар», — дея аниқлик киритди Мурашко.
Вазирлик раҳбари бундай болаларнинг ота-оналарига уларни мактабга жўнатишдан олдин шифокор маслаҳатлари ва тавсияларини олиши кераклигини айтди.
Вазирнинг эслатишича, айни пайтда катта ёшлилар учун COVID-19’га қарши вакцинанинг қўшимча синовлари ўтказилмоқда, унинг самарадорлиги ва хавфсизлиги масаласи тадқиқ қилинмоқда.
«Тиббиёт ходимлари ва педагоглар устувор гуруҳга киради. Уларга коронавирусга қарши эмлаш таклиф қилинади. Мактабларда турли ёшдаги ўқитувчилар ишлагани сабабли, биринчи навбатда, катта ёшли педагогларга эмлаш олишни тавсия қиламиз», — дея қўшимча қилган Михаил Мурашко.
Аввалроқ Россия президенти Владимир Путин коронавирусга қарши яратилган биринчи вакцина «Спутник V»ни олган қизи ўзини яхши ҳис қилаётганини маълум қилганди.
Шунингдек, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги хабар қилинди.
Изоҳ (0)