Украина ҳукумати хориж давлатларининг фуқароларининг мамлакат ҳудудига киришига коронавирус инфекцияси билан касалланиш ҳолатлари кўпайгани сабабли яна тақиқ қўйди. Хорижликлар 28 августдан 28 сентябрга қадар Украина ҳудудига кира олмайди. Бу ҳақда мамлакат ташқи ишлар вазирлиги хабар тарқатган.
Мамлакат фуқаролигига эга шахснинг эр-хотин, ота-она ва фарзандларига, фуқаролиги бўлмаган шахсларга, таълим олиш учун келган ҳамда бошқа тоифадаги хорижликларга истисно тариқасида ҳудудга киришга рухсат берилади. Шунингдек, Украинага транзит орқали келаётганларга ҳам мазкур тақиқ тааллуқли эмас.
Украинада коронавирус аниқланган фуқаролар сони 112 минг нафардан ошган, 2403 нафар киши касаллик асоратлари оқибатида вафот этган. 54 мингдан зиёд бемор инфекциядан фориғ бўлган. Охирги икки ҳафта давомида мамлакатда COVID-19 билан касалланиш ҳолатлари кескин ошган.
Эслатиб ўтамиз, 2020 йил 1 августда Украина Соғлиқни сақлаш вазирлиги коронавирус билан боғлиқ ноқулай вазият мавжуд бўлган «қизил ҳудуд» ҳисобланган мамлакатлар рўйхатини янгилаган ва Ўзбекистон ҳам унга киритилганди.
Изоҳ (0)