Россия Ташқи ишлар вазирлигининг Москва давлат халқаро муносабатлар институти (МДХМИ) ректори Анатолий Торкунов «Дўстлик» ордени билан мукофотланди. Бу ҳақда Ўзбекистон Президенти Шавкат Мирзиёевнинг тегишли фармони имзоланган.
Фармонда Анатолий Торкуновнинг Ўзбекистон ва Россия ўртасидаги стратегик шериклик муносабатларини мустаҳкамлаш, гуманитар соҳадаги кўп йиллик самарали ҳамкорликни ҳамда академик ва илмий-таълим алмашувлар бўйича узоқ муддатли дастурларни амалга оширишни қўллаб-қувватлашдаги шахсий ҳиссаси, шунингдек, халқаро муносабатлар ва иқтисодиёт соҳасида юқори малакали мутахассисларни тайёрлашдаги бевосита иштироки қайд этилган.
Маълумот учун, Тошкентда 2019 йилнинг декабрь ойида МДХМИнинг филиали очилган. Бу ҳақда Россия президенти Владимир Путиннинг 2018 йил октябрь ойида Ўзбекистонга ташрифи чоғида келишилган эди.
Бугунги кунга қадар МДХМИни 400 дан зиёд ўзбекистонлик битирган. Улар орасида давлат арбоблари, олимлар, йирик ишбилармонлар бор. Иккинчи жаҳон уруши фахрийси, олим Қўчқор Хонназаров, МДХМИнинг Васийлик кенгаши раиси ўринбосари Алишер Усмонов, Евроосиё банки директорлар кенгаши аъзоси, Eurasian Resources Group Sa.r.I (ERG) компанияси асосчиларидан Фаттоҳ Шодиев шулар жумласидан.
Изоҳ (0)