Короновирусга нисбатан оммавий иммунитет шаклланиши учун аҳолининг 60 фоиздан 80 фоизгача қисми касалланиб, соғайиши керак. Бу ҳақда 26 август, чоршанба куни АОКАда бўлиб ўтган брифингда Коронавирусга қарши кураш штаби аъзоси Барно Абдусаматова маълум қилди.
Барно Абдусаматованинг алоҳида таъкидлашича, оммавий иммунитетни шакллантириш учун кўплаб одамларнинг ҳаётини, айниқса хавф гуруҳига кирувчи: сурункали касалликлари бор, ёши катталар, ҳомиладорлар ва болаларни хавф остига қўйишимиз мумкин.
«Кўп одамларнинг касалланиши, даволаниши ва иммунитет ҳосил қилиши учун бир неча йиллар керак бўлади. Шунингдек, эпидемиянинг олдини олмасак, инфекция тарқалиши ривожланиб кетади. Оқибатда касалланиш ҳолатлари ошиб кетади, бунинг натижасида клиникаларда бемор кўпайиб, соҳага босим ортади, ўлим сони ортади. Шунинг учун ушбу йўлни Ўзбекистон ҳеч қачон танламайди. Аксинча, пандемияни назоратда ушлаб туриб, кўп вақт давомида камроқ одамлар касал бўлишига эришишимиз мумкин. Шу давр ичида эса вакцина масаласи ҳам ҳал бўлиши мумкин», — деди мутахассис.
Аввалроқ, Жаҳон соғлиқни сақлаш ташкилотининг соғлиқни сақлаш соҳасида фавқулодда вазиятлар бўйича дастурлари директори Майкл Райан жамоавий, яъни коллектив иммунитет COVID-19’ни енгиб ўтилишини англатмаслигини маълум қилган эди.
Изоҳ (0)