Қашқадарёда Деновбола қишлоғини шаҳар маркази билан боғловчи йўлнинг 50 метр қисми ёпилиб қолганди. Фавқулодда вазиятлар вазирлиги мазкур ҳудудда йўлни таъмирлаш ишлари бошлангани ҳақида маълум қилди.
«Қашқадарё вилояти Китоб тумани ‘Кухсор’ маҳалла фуқаролар йиғинига қарашли Деновбола қишлоғини шаҳар маркази билан боғловчи Паландара—Жавуз—Деновбола ички автомобиль йўлининг 39-километрида, тахминан, 252 минг метр куб ҳажмга тенг бўлган иккиламчи оқувчи кўчки ҳосил бўлган. Деновбола қишлоғини шаҳар маркази билан боғловчи автомобиль йўлининг 50 метр қисмини кўчки массаси қоплаганди.
Китоб туман ҳокимлиги, туман Фавқулодда вазиятлар бўлими, Шаҳрисабз кузатиш станцияси ходимлари, шунингдек, 3 та махсус техника ва 20 нафардан зиёд маҳаллий аҳоли вакилларининг ёрдами билан йўлнинг тупроқ кўчкилари таъсирида ёпилиб қолган қисмида тозалаш ва таъмирлаш ишлари амалга оширилмоқда», — дейилади хабарда.
2019 йилда Китоб туманидаги Деновбола қишлоғи аҳолиси туман марказига бориши учун 3 километр масофада айланма йўл қуриб, битказилганди.
Изоҳ (0)