Бухоро вилоятида ўндан ортиқ фуқароларнинг жами 489 миллион 250 минг сўмга баҳоланган қорамолларини алдов йўли билан олиб, уларни сотиб юборган ва пулларни ўз эҳтиёжи учун сарфлаган шахс қўлга олинди. Бу ҳақда «Дарё»га Қоракўл туман ички ишлар бўлими ҳузуридаги Тергов бўлинмаси катта терговчиси, капитан Лутфулла Жўраев хабар берди.
Маълум бўлишича, 2020 йилнинг август ойи давомида Қоракўл туман ички ишлар бўлимига туман ҳудудида яшовчи бир нечта фуқаролардан «Дарғабоғи» маҳалласида яшовчи, 26 ёшли мол олиб-сотар М.С.нинг қорамол олиб, ҳозирга қадар пулларни бермай келаётгани ҳақида аризалар тушган.
Мазкур ҳолат юзасидан ҳуқуқ-тартиб идоралари ходимлари томонидан терговга қадар тезкор текширув ҳаракатлари олиб борилган.
Тергов давомида М.С. «Полвонлар», «Мирзақалъа», «Камолот», «Қораун», «Дарғабоғи» маҳаллаларида яшовчи 13 нафар фуқаронинг қорамолларини олиб, сотиб беришини ва пулини тез орада беришини айтиб, алдаб кетгани маълум бўлган. Мол олиб-сотар бу ҳаракати билан жабрланувчиларга жами 489 миллион 250 минг сўм миқдорда моддий зарар етказган.
«Якка тартибда меҳнат фаолияти билан шуғулланувчи М.С. тергов органи томонидан ушланган. Унга такроран содир қилган бир неча оғир ва ўта оғир жиноятлари учун Жиноят кодексининг 168-моддаси 3-қисми «а»,«б» бандлари (кўп миқдорда, такроран ёки хавфли рецидивист томонида фирибгарлик) 168-моддаси 4-қисми «а» банди (жуда кўп миқдорда фирибгарлик) билан айб эълон қилинган. Айни пайтда унга нисбатан қамоқ эҳтиёт чораси қўлланилган», — дейди Лутфулла Жўраев.
Мавзуга доир:
- Термизда фермерларнинг ҳисоб рақамидаги пулларни талон-тарож қилган собиқ банк ходими қўлга олинди
- Чилонзорда бир кишини қоровул сифатида ишга жойлаштириш учун 100 доллар олган фирибгар фош этилди
- Навоийда маҳалла раиси икки нафар эҳтиёжманд фуқародан 28,5 млн сўмни фирибгарлик орқали қўлга киритгани аниқланди
Изоҳ (0)