Самарқандда тўйдан юк ортиб чиққан «ЗИЛ» ҳайдовчиси шу тўйдан чиққан маст кишини босиб кетди

Самарқандда тўйдан юк ортиб чиққан ҳайдовчи тўйдан чиққан пиёдани босиб кетди. Бу ҳақда ЙҲХББ матбуот хизмати хабар берди.

Воқеа 26 август куни соат 00:50 ларда Самарқанд вилояти, Самарқанд тумани «Қамчинон» маҳалласининг ички тор кўчасида содир бўлган.

27 ёшли ҳайдовчи Ф.Ф. «ЗИЛ» юк машинасини орқага ҳайдаётиб, ортида ҳаракатланиб кетаётган маст ҳолдаги 43 ёшли Д.Т.ни босиб ўтиб кетган. Оқибатда Д.Т. олган оғир тан жароҳатларидан воқеа жойида вафот этган.

Қайд этилишича, юк машинаси ҳайдовчиси шу кўчадаги хонадондан тўй жиҳозларини ортиб кетаётган, маст пиёда эса тўйдан маст ҳолда чиқиб кетаётган бўлган.

Мазкур ЙТҲ юзасидан 26 август куни Самарқанд тумани ИИБ ҳузуридаги Тергов бошқармаси томонидан Жиноят кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.

Ҳозирда тергов ҳаракатлари олиб борилмоқда.