Наманганда Akhsikent hotel меҳмонхонаси фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
«Муҳаммадали файзли боғбон» МЧЖ томонидан барпо этилган 7 қаватли меҳмонхона 163 ўринга мўлжалланган бўлиб, 76 та хонадан иборат. Уларнинг биттаси апартамент, 5 таси люкс ҳамда 70 таси стандарт хонадан иборат.
Мазкур меҳмонхона қурилиши учун жами 40 миллиард сўм маблағ сарфланди ва 40 та янги иш ўрни яратилди. Йил давомида 40 минг нафар маҳаллий ва хорижий меҳмонга хизмат кўрсатиш имконияти мавжуд.
Меҳмонхонанинг Ахсикент деб номланишида рамзий маъно бор: Заҳириддин Муҳаммад Бобур таваллуд топган кўҳна Ахсикент қолдиқлари ҳам айнан Наманган вилоятида жойлашган.
Маълумот учун, Akhsikent hotel фойдаланишга топширилиши билан Намангандаги меҳмонхоналар сони 29 тага етди. 2020 йилнинг ўзида вилоятда жами 550 ўринли яна 10 та меҳмонхона қуриш режалаштирилган.
Изоҳ (0)