Танзила Норбоева: «Баъзи қонунлар ўз вақтида айрим шахслар манфаатига мослаб чиқарилган»

Tashkent City’даги Конгресс-ҳоллда 26 август куни Сенат ҳузуридаги Ёшлар парламенти аъзоларининг «Ёшларга оид давлат сиёсатини амалга оширишда Ёшлар парламентининг ўрни ва истиқболдаги долзарб вазифалар» мавзусида давра суҳбати ўтказилди. Бу ҳақда «Kun.uz» хабар қилди.

Давра суҳбатида Олий Мажлис Сенати раиси Танзила Норбоева, сенаторлар ва ёшлар масалалари бўйича масъул идоралар вакиллари ҳам иштирок этган.

Суҳбат аввалида Танзила Норбоева ёшлар парламентини тузишдан кўзланган мақсадлар ҳақида гапирди.

«Ёшлар парламенти аъзолари Сенатда қабул қилинаётган барча қонунлар, айниқса, ёшлар масаласига оид қонунларга ўз таклифларини бериши керак. Ёки ҳукумат ҳозир қандай янги қонунлар қабул қилиши керак? Нималар Ўзбекистоннинг ривожига тўсиқ бўляпти? Балки, биз ёши катталар шу жиҳатларни кўрмаётгандирмиз. Марҳамат, барча ўз таклифини кирицин», – деди Сенат раиси.

Сенат раиси Ўзбекистоннинг амалдаги ҳукумати олдида турган қатор масалаларни ҳам санаган ва уларни ҳал қилишда ёшларнинг ўрни юқори эканини таъкидлаган.

«Тан олиш керак, ҳозир ишлаётган айрим қонунлар коррупцияга йўл очади ёки соф рақобатга йўл бермайди. Бу қонун ёки нормалар ўз вақтида айрим шахсларнинг манфаатларига мослаб ишлаб чиқилгани ҳам ҳақиқат», – деди у.

Сенат раиси гап айнан қайси қонун ҳужжатлари ҳақида бораётганига аниқлик киритмаган. Ўз нутқи давомида Танзила Норбоева қатор масалаларда ёшларни таклифи ва ташаббуси жуда муҳимлигини таъкидлаган.

«Халқаро рейтинглар, гендер тенглиги масалаларини олинг. Бу кўрсаткичларда ўрнимизни яхшилаш биз учун жуда муҳим. Чунки бу орқали Ўзбекистонга кирадиган инвестициялар оқимини яхшилаймиз. Одам савдоси муаммоси ҳам олдимиздаги катта муаммо. Афсуски, бу муаммонинг қурбонлари жуда кўп ҳолатда ёшлар ва аёллар бўлиб қоляпти.

Мен нега буларни гапиряпман. Бу масалаларда албатта сизнинг таклиф ва ташаббусларингиз биз учун жуда муҳим», – деди Норбоева.

Аввалроқ Танзила Норбоева 22 август куни молия вазири Темур Ишметов билан мулоқоти давомида қандайдир тор доирадаги шахсларнинг манфаати халқ манфаатидан устун бўлиши керак эмаслигини алоҳида таъкидлаб ўтган эди.