АҚШда Голливуднинг таниқли актёри Уилл Смит иштирокидаги «Мен — афсона» фильмида суратга тушган Ford Mustang Shelby GТ500 сотувга қўйилди, деб хабар беради CARakoom.
Расмий маълумотларга кўра, суратга олиш ишлари учун жами олти дона Shelby GТ500 ишлаб чиқарилган, бироқ уларнинг бештаси суратга олиш якунлангач, Ford компанияси томонидан йўқ қилинган. Бу Уилл Смит фильм вақтида бошқарган модель омон қолган ягона нусха эканлигини англатади.
2007 йилда ишлаб чиқарилган автомобиль ҳозирга қадар ёпиқ бинода сақланган ва ҳамон киностудияга тегишли. Нью-Милфордда сақланган машинага фақат расмий дилер хизмат кўрсатган. Автомобиль ҳозирга қадар 10 629 километр йўл босган.
Кузов ёрқин қизил рангга бўялган ва кенг оқ пойга чизиқларига эга, шунингдек, ғилдираклари кумушранг. Салон қисми эса қора ва қизил чарм билан қопланган, қурилмалар панелида эса Кэрролл Шелби томонидан имзоланган «табличка» ҳам бор.
Mustang GТ500’га 500 от кучига эга 5,4 литрли V8 двигатели ўрнатилган бўлиб, у механик узатмалар қутиси ёрдамида бошқарилади.
Автомобилни харид қилишни истаганлар 85 минг доллар тўлашларига тўғри келади.
Аввалроқ Голливуд актёри Сильвестр Сталлоне ўзининг шахсий Cadillac Escalade йўлтанламасини 350 минг доллар эвазига сотувга қўйгани тўғрисида хабар берилганди.
Изоҳ (0)