Тошкент ҳокимлиги Аҳмад Дониш кўчаси ёпилиши ҳақида кўча ёпиб бўлинганидан бир кун ўтиб хабар берди

Тошкентнинг Юнусобод туманидаги Аҳмад Дониш кўчасининг Янгишаҳар кўчасидан Тошкент ҳалқа автомобиль йўлигача бўлган қисми 1 сентябрга қадар ёпилади, дея хабар бермоқда Тошкент шаҳар ҳокимлиги матбуот хизмати.

Кўча «таъмирлаш ва ободонлаштириш ишлари амалга оширилиши сабабли» ёпилмоқда; ҳокимлик матбуот хизматининг қўшимча қилишича, Мega Planet савдо мажмуаси яқинидаги чорраҳа ҳам 1 сентябргача ёпиқ бўлади.

«Юзага келиши мумкин бўлган тирбандликларнинг олдини олиш мақсадида ҳайдовчиларга айланма йўллардан фойдаланишларини тавсия этамиз. Ноқулайликлар учун узр сўраймиз!», — дейилади ҳокимлик ахборотида.

Қайд этиш жоиз, Тошкент ҳокимлиги «кўча 1 сентябрга қадар ёпилади» деб 25 август куни соат 14:30 да эълон қилган бўлса-да, аслида кўча ва Мega Planet савдо мажмуаси олдидаги чорраҳа бир кун аввал ёпилиб бўлган эди.

23 август куни соат 19:38 да «Водители Ташкента» каналида «Юнусобод» бозори олдидаги кўприк, шунингдек, Мega Planet олдидаги чорраҳа ёпилгани, шу боис чорраҳа олдида катта тирбандлик юзага келгани маълум қилинган.

24 август куни соат 10:37 да эса Мega Planet олдидаги чорраҳа тўлиқ ёпилгани, «ҳаммаёқда тирбандликлар» юзага келгани, «Мega Planet атрофлари ‘полний бардак’, жиннихона, йўл ёпиқ»лиги ҳақида хабарлар қолдирилган.

Аҳмад Дониш кўчаси «Юнусобод» бозори олдидаги кўприкдан то «17 нинг охири»гача ёпиқлигидан бехабар ҳайдовчиларнинг деярли бари шаҳарга Янги Юнусобод кўчаси орқали чиқишга ҳаракат қилган, шу боис ушбу кўчада 24 август куни тонгда ҳам, 25 август куни тонгда ҳам катта тирбандликлар юзага келган.

«Ко дну» каналида 24 август оқшомида қолдирилган хабарга кўра, йўналиши Аҳмад Дониш кўчасидан ўтган автобуслар «иккинчи кундирки чор-атрофдаги маҳаллаларнинг тор кўчалари бўйлаб ҳаракатланмоқда», «Тошшаҳартрансхизмат» компанияси эса автобусларнинг йўналиши вақтинча ўзгаргани ҳақида ахборот бермаган.

«Бу вақтда эса ‘Тошшаҳартрансхизмат’ матбуот хизмати йўловчиларга автобусларнинг ўзгарган йўналишлари ҳақида ахборот бериш ўрнига ўз каналида йўловчиларга ҳеч нарса бермайдиган бефойда ахборот улашиб ўтирибди. Автобуслар эса яна ҳар доимгидек ҳайдовчи билганича, ҳайдовчи хоҳлаганича юрибди, ғазабнок йўловчилар эса нима бўлаётганини тушунмай, автобусни энди қаерда кутиши кераклигини билмай, тентираяпти», — деб ёзади «Ко дну».