Суд Бухоро шаҳрида Nexia’нинг орқа ён ойнасига парда ўрнатган ҳайдовчининг ушбу ҳаракатида Маъмурий жавобгарлик тўғрисидаги кодекс 126-моддасининг 1-қисмида назарда тутилган ҳуқуқбузарлик аломатлари мавжуд эмас деб топди. Бу ҳақда Олий суд ахборот хизмати хабар қилган.
Б.Бахранов 2019 йил 18 апрель куни Бухоро шаҳри кўчалари бўйлаб Nexia’да ҳаракатланиб бориш вақтида ЙҲХБ ходими томонидан тўхтатилган. Текширув вақтида автомашинанинг орқа ён эшик ойналарига ҳайдовчи ўрнидан теварак-атрофни кўришни чеклайдиган қўшимча нарса ўрнатилган транспорт воситасидан фойдаланиб келиб, йўл ҳаракати қоидаларининг 3-иловаси 7.3-банди талабларини бузганлиги учун Маъмурий жавобгарлик тўғрисидаги кодекснинг 126-моддасининг 1-қисми (кўзгусимон ва (ёки) туси ўзгартирилган (қорайтирилган) ойнали, шунингдек, теварак-атрофни кўришни чеклайдиган қопламали транспорт воситаларидан фойдаланиш) билан маъмурий баённома расмийлаштирилган.
Бахранов судга мурожаат қилиб, ҳаракатларида маъмурий ҳуқуқбузарлик аломатлари йўқлиги сабабли унга нисбатан қўлланилган маъмурий ҳуқуқбузарлик ишини тугатишни сўраган.
Судда мутахассис сифатида сўралган Ф.Ирисов техник регламентга мувофиқ кўзгусимон ёки туси ўзгартирилган (қорайтирилган) ойналарнинг ёруғлик ўтказувчанлиги 70 фоиздан кам бўлган тақдирда ушбу автомашиналардан фойдаланиш тақиқланиб, бундан ойналар тусини ўзгартириш (қорайтириш) учун тегишли рухсатнома берилган транспорт воситалари мустасно эканлиги, шунингдек, парда ўрнатилган ойнада ёруғлик ўтказувчанлиги даражасини текшириш имкони мавжуд эмаслиги, чунки мазкур текширув фақатгина туси ўзгартирилган ойналарда ёруғлик ўтказувчанлигини текширишни назарда тутиши, парда ўрнатилиши ойналарнинг тусини ўзгартириш (қорайтириш) ҳисобланмаслигини баён қилган.
Бахранов бошқарувида бўлган машинанинг орқа ён эшик ойналарига парда ўрнатган ҳолда ҳаракатланганлиги учун унга нисбатан маъмурий баённома расмийлаштирилган бўлса-да, юқоридаги қонун ва норматив-ҳуқуқий ҳужжатларда ҳайдовчи ўрнидан теварак-атроф кўриниши майдонига орқа ён эшик ойналари кирмаслиги назарда тутилган бўлиб, ушбу ойналарга кўришни чекловчи қўшимча нарсалар ўрнатиш ёки қопламалар суртиш мумкин эмаслиги амалда бўлган қонун ёки норматив-ҳуқуқий ҳужжатлар билан тақиқланмаган.
«Бундан ташқари, суд, мутахассис Ф.Ирисовнинг берган кўрсатмалари ва ишнинг ҳақиқий ҳолатидан келиб чиқиб Б.Бахрановнинг автомашина орқа ён эшикларига парда ўрнатганлик ҳолатини йўл ҳаракати қоидаларининг 3-иловаси 7.4-банди талабларининг бузилиши сифатида малакалаб бўлмайди», — деб ҳисоблаган.
«Суд, юқоридаги қонун талаблари ва ишнинг ҳақиқий ҳолатидан келиб чиқиб, Б.Бахрановнинг транспорт воситасини орқа ён эшик ойналарига парда ўрнатган ҳолда фойдаланиб келганликда ифодаланган ҳаракатларида МЖтК 126-моддасининг 1-қисмида назарда тутилган ҳуқуқбузарлик аломатлари мавжуд эмас деб топиб, унга нисбатан бўлган маъмурий ҳуқуқбузарлик ишини тугатишни лозим деб топди», — дейилади хабарда.
2019 йил октябрда Бухоро шаҳар маъмурий суди автомобилларнинг орқа ён ойнасига парда тақиш масаласида ҳайдовчи фойдасига қарор чиқарган. Суд қароридан норози бўлган Бухоро ИИВ ЙҲҲБ вилоят маъмурий судида бўлиб ўтган кассация тартибидаги мажлисда ўз важларини исботлаб бера олмаган ва ютқазган. Худди шу каби масала юзасидан ўтган йилнинг сентябрь ойида Фарғонанинг Тошлоқ маъмурий суди ва октябрь ойида эса Самарқанд шаҳар маъмурий суди ҳам ҳайдовчиларга солинган жарималарни бекор қилиш ҳақида қарорлар чиқарган.
Шундан сўнг ИИВ автомобиль орқа ён ойналарига парда тутувчи нормани қонунчиликка аниқ-тиниқ киритишни назарда тутувчи ҳужжат лойиҳасини жамоатчилик муҳокамасига тақдим этган. Бу ҳолатни, жумладан, Олий Мажлис Қонучилик палатаси депутати Расул Кушербаев шундай баҳолаган: «Биз ҳақмиз, деган даъвоси аслида нотўғри бўлиб, энди сўзда собит туриш учун қайсарлик билан қонунни ўзгартиришмоқчи».
Изоҳ (0)