Ота-оналар қуйидаги жумлаларни қиз фарзандларга ўзлари билмаган ҳолда кўп бор такрорлайдилар. Бу эса унинг руҳияти, шахс бўлиб шаклланиши ва ҳаётда ўрнини топишига салбий таъсир кўрсатади.
Бўлажак уй бекасисан
Қизингиз келажакда уй бекаси эмас, иқтисодчи ёки муҳандис бўлса-чи? Фарзандингизга уй ишларини келажаги ёки тақдири бўлгани учун эмас, тоза ва саранжом уйда яшаш, мазали таом ейиш ёқимли эканидан бажариш кераклигини ўргатинг.
Ён бер, сен қиз боласан
Қизингиз қиз бола бўлгани учунгина ўз хоҳиш ва қизиқишларига қарши бориши шарт эмас. Кимгадир паст ёки баланд кетиш, ён бериш ёки кўнишни унинг ўзи вазиятга қараб ҳал қилиши керак. Албатта, муроса қилиш яхши, лекин ўзини ҳимоя қила олиш, хафа қилдириб қўймаслик ва йўқ дея олишни ҳам билиш керак. Яхшиси, фарзандингизга масаланинг моҳиятини тушуниш кераклиги ва музокара қилишни ўргатинг.
Мулойим бўл
Қизингиз энг аввало инсон, инсонлар эса бир хил эмас, уларнинг туйғулари, вазиятга қараб реакциялари бўлиши табиий. Қаршисидаги инсон ноҳақ овозини кўтарганда ҳам қиз бола бўлгани учунгина индамай ичига ютиши ва муносабат билдирмаслиги керак эмас. Барча инсон баъзида жаҳл қилиши, агрессив бўлиши, йиғлаши ва энергияси камайганини ҳис қилиши мумкин. Унга қандай вазият бўлмасин ақл билан муаммоларни ҳал қилиш, ўйлаб ечим топиш кераклигини ўргатинг.
Кек сақлама
Ушбу пункт ҳам қизиқиш ва қарашларига қарши бориш билан боғлиқ. Сизга кимдир ёмонлик қилгани ёки хафа қилган, сизни дилингизни оғритган бошқа бир инсон билан гаплашишни истамаганингизни эсланг — бу кек сақлаш эмас, муносабатга нисбатан жавоб реакцияси ҳисобланади.
Айёрроқ бўл
Истаган нарсани қўлга киритиш ёки мақсадга эришиш учун қандайдир қинғир йўлларни танлаш ёки макр ишлатиш аёлларга хос, қолаверса, ҳақиқий туйғуларни яшириш учун ўзини аслидан бошқача тутиш керак, деган тушунча бор. Аммо буларнинг ҳар иккиси ҳам қизингизни бахтли қилиб қўймайди, аксинча бахтига тўғаноқ бўлади, оилавий муносабатлари дарз кетиши, ҳамкасб ва дўстлари ишончи йўқолишига олиб келади.
Аёл киши бошқаларни бошқаришни билиши керак
Бошқа одамлар ҳаётига аралашиш, уларни чизган чизиғидан чиқмаслигини исташ бу худбинлик ва бунинг оқибати яхшилик билан тугамайди. Қизингизга тўғри бўлишни, мақсадга эришиш учун бошқалардан фойдаланмаслик кераклигини уқтиринг.
Асосийси турмушга чиқиш
Муҳими бахтли бўлиш. Шунинг учун ҳам қизингизга тезроқ турмушга чиқиш эмас, асосийси мустаҳкам оила қуриш ва бахтли ҳаёт кечириш кераклигини тушунтиринг.
Уй ишларини эпласанг бўлди
Қиз бола саранжом бўлиши кераклиги ва озодалик кишига ёқимли экани рост, лекин фарзандингиз фақат уй ишлари билан чекланиб қолмасин. Қизиқишига қараб фан, спорт ва ижод билан шуғулланишига имкон беринг.
Ишлаш ҳақида ўйлама
Ҳар бир инсон хоҳ эркак бўлсин, хоҳ аёл шахсий харажатлари бўлиши табиий. Ишлаган киши ўзини ўзи эплайди, майда нарсалар учун ҳам бошқаларнинг қўлига қараб қолмайди. Бундан ташқари, яхши кўрган иши билан шуғулланиш кайфиятга ижобий таъсир кўрсатади, ҳамкасблар билан мулоқотда бўлган инсон ким билан қандай муомала қилиш, ўзини қаерда қандай тутиш кераклигини ўрганади.
Изоҳ (0)